लाखो मातांचे आशीर्वाद माझ्यासाठी ऊर्जा, प्रेरणा, संरक्षणकवच : मोदी; बचत गटांतील महिलांशी संवाद

मोदी म्हणाले, की गेल्या शतकातील भारत आणि या शतकातील नव्या भारतातील मोठा फरक आपल्या स्त्रीशक्तीच्या प्रतिनिधित्वाच्या रूपाने दिसतो. आजच्या नव्या भारतात पंचायत भवन ते राष्ट्रपती भवनापर्यंत स्त्रीशक्तीचा झेंडा डौलाने फडकत आहे. जिथे महिलांचे प्रतिनिधित्व वाढले, त्या क्षेत्रात आपोआपच यश मिळाले आहे. ‘स्वच्छ भारत अभियान’चे यश हे याचे एक उत्तम उदाहरण आहे.

गेल्या आठ वर्षांत बचतगटांना सक्षम करण्यासाठी आम्ही सर्वतोपरी मदत केली. आज देशभरातील आठ कोटींहून अधिक भगिनी या मोहिमेशी जोडल्या गेल्या आहेत. प्रत्येक ग्रामीण कुटुंबातील किमान एका भगिनीने या अभियानात सहभागी व्हावे, हाच आमचा उद्देश आहे. खेडय़ातील अर्थव्यवस्थेत महिला उद्योजकांना प्रोत्साहन देण्यासाठी आणि त्यांच्यासाठी नवीन संधी निर्माण करण्यासाठी आमचे सरकार सातत्याने काम करीत आहे.   

– नरेंद्र मोदी, पंतप्रधान