उपराष्ट्रपतीपद निवडणूक: बहुजन समाज पक्षाचा एनडीएचे उमेदवार जगदीप धनखर यांना पाठिंबा, तर तृणमुलचा मतदानापासून दूर राहण्याचा निर्णय

नागरिकांचे हित आणि त्यासाठीची चळवळ लक्षात घेता बहुजन समाज पक्षाने धनखर यांना पाठिंबा देण्याचा निर्णय घेतल्याचे ट्वीट मायावती यांनी केले आहे. सत्ताधारी आणि विरोधकांमध्ये एकमत होऊ न शकल्याने देशाच्या सर्वोच्च पदासाठी अखेर निवडणूक पार पडली, असेही त्या एका ट्विटमध्ये म्हणाल्या. हीच परिस्थिती उपराष्ट्रपतीपदाच्या निवडीसंदर्भात पुन्हा उद्भवल्याने येत्या ६ ऑगस्टला निवडणूक होत असल्याचे मायावती यांनी म्हटले आहे. विरोधी पक्षांकडून मार्गारेट अल्वा यांना उपराष्ट्रपतीपदासाठी उमेदवारी जाहीर करण्यात आली आहे.

व्यवसायाने वकील असलेले जगदीप धनखर यांनी १९८९ साली आपल्या राजकीय कारकिर्दीला सुरुवात केली. २०१९ साली पश्चिम बंगालच्या राज्यपालपदी नियुक्ती झाल्यानंतर मुख्यमंत्री ममता बॅनर्जी यांच्यासोबतच्या तणावपूर्ण संबंधामुळे ते चर्चेत होते. राज्यपालपदाचा राजीनामा दिल्यानंतर धनखर आता उपराष्ट्रपतीपदाची निवडणूक लढवत आहेत. भारताच्या दुसऱ्या सर्वोच्च घटनात्मक पदासाठीच्या निवडणुकीत राज्यसभा आणि लोकसभेतील खासदार मतदान करतील. या निवडणुकीसाठी बिजू जनता दलाने(बीजेडी) यापूर्वीच धनखर यांना पाठिंबा जाहीर केला आहे.