बुराडी इमारत दुर्घटना : “केवळ तीन टोमॅटो खाऊन ३० तास काढले”, मलब्याखाली अडकलेल्या कुटुंबाची आपबिती

या दुर्घटनेतून सुखरूप बचावल्यानंतर राजेश यांनी बचाव पथकांचे आभार मानले. तसेच त्यांनी सांगितलं की “मी व माझ्या कुटुंतील सदस्यांनी केवळ तीन टोमॅटो खाऊन आमची भूक भागवली. तीन टोमॅटोंवर आम्ही ३० तास काढले”.

राजेश म्हणाले, “संध्याकाळी ६.३० च्या सुमारास इमारत कोसळली. मी व माझी बायको मिळून संध्याकाळचं जेवण बनवत असतानाच ही दुर्घटना घडली. आम्ही आमच्या अंगावरील मातीचा ढिगारा हटवण्यासाठी खूप प्रयत्न केल. परंतु, आम्हाला यश मिळालं नाही. मी हार मानली होती. मी सगळं काही ईश्वरावर सोडून दिलं होतं. जिथे आम्ही अडकलो होतो तिथे आमच्याजवळ केवळ तीन टोमॅटो होते. आम्ही हे तीन टोमॅटो खाऊन तीस तास तग धरला. बचाव पथकांनी आम्हाला बाहेर काढलं तेव्हा आम्ही बेशुद्ध होतो. आम्हाला कधी बाहेर काढलं, रुग्णालयात कधी व कसं नेलं हे आम्हाला माहिती नाही. आम्हाला थेट रुग्णालयात उपचारांनंतर शुद्ध आली”.

“तीन टोमॅटो खाऊन ३० तास काढले”

बुराडीमध्ये एका इमारतीचं काम चालू होतं. हे काम चालू असतानाच इमारत कोसळली. त्यामुळे ढिगाऱ्याखाली २० जण अडकले होते. यामध्ये मजुरांची संख्या जास्त होती. बुराडीमधील कौशिक एन्क्लेव्ह परिसरातील ऑस्कर पब्लिक स्कूलजवळ ही दुर्घटना घडली. ढिगाऱ्याखाली अडकलेल्या लोकांना वाचवण्यासाठी बचाव पथकं ३६ तासांहून अधिक वेळ प्रयत्न करत होते. त्यांनी १५ हून अधिक लोकांना वाचवलं आहे.