…म्हणून पीयुष गोयल यांना मिळाले केंद्रीय रेल्वे मंत्रीपद

याआधी पीयुष गोयल हे राज्यमंत्री होते आणि त्यांच्याकडे उर्जा आणि कोळसा खात्याचा स्वतंत्र कार्यभार होता. या खात्यात पीयुष गोयल यांनी मोठ्या सुधारणा घडवून आणल्या. २०१४ मध्ये भारतात अशी १८ हजार गावे होती ज्या गावांमध्ये वीज पोहचली नव्हती, मागील तीन वर्षांच्या काळात म्हणजेच पीयुष गोयल यांनी कार्यभार सांभाळल्यापासून ही संख्या ४ हजार गावांवर आली आहे. २०१४ च्या लोकसभा निवडणुकांच्या वेळी प्रचार, जाहिराती आणि सोशल मीडियाच्या माध्यमातून युवकांसोबत संवाद साधण्याची जबाबदारी पीयुष गोयल यांच्यावर टाकण्यात आली होती. या जबाबदारीचे शिवधनुष्यही पीयुष गोयल यांनी लिलया पेलले.

एक यशस्वी चार्टड अकाऊंटंट आणि बँकर म्हणूनही एकेकाळी गोयल यांचा लौकिक होता. या सगळ्या कारणांमुळेच पीयुष गोयल यांना राज्यमंत्रीपदावरून बढती देत कॅबिनेटमंत्रीपद देण्यात आले तसेच रेल्वेसारख्या महत्त्वाच्या खात्याची धुरा त्यांच्या खांद्यावर देण्यात आली आहे. आता येत्या दोन वर्षात रेल्वेत वैविध्यपूर्ण बदल होऊन होणारे अपघात कमी होण्यास मदत होईल अशी अपेक्षा व्यक्त होते आहे.

कोणत्या मंत्र्याला कोणते खाते मिळणार? याची चर्चा सुरू असताना पीयुष गोयल यांच्याकडे अरूण जेटली सांभाळत असलेले अर्थ खाते देण्यात येईल अशीही एक चर्चा रंगली होती. मात्र तसे झाले नाही, दरम्यान पीयुष गोयल यांना रेल्वे खाते जाहीर झाल्यानंतर सुरेश प्रभू यांनी त्यांचे अभिनंदनही केले आहे.

Welcoming my long time dear friend,colleague @PiyushGoyal to @RailMinIndia.I offer all my help to him to make railways world class.all best

— Suresh Prabhu (@sureshpprabhu) September 3, 2017

Thanks to all 13 Lacs+ rail family for their support,love,goodwill.I will always cherish these memories with me.Wishing u all a great life

— Suresh Prabhu (@sureshpprabhu) September 3, 2017