जम्मू : जम्मू-काश्मीरच्या कठुआ जिल्ह्यातील जसरोटा पट्ट्यात रविवारी प्रचारसभेला संबोधित करताना काँग्रेसचे अध्यक्ष मल्लिकार्जुन खरगे यांची प्रकृती बिघडली. वैद्याकीय उपचार घेतल्यानंतर त्यांनी पुन्हा भाषणाला सुरुवात केली. डॉक्टरांनी केलेल्या तपासणीनंतर खरगे यांची प्रकृती स्थिर असल्याचे काँग्रेस नेत्यांनी सांगितले. ‘‘माझे वय ८३ आहे. मला इतक्या लवकर मृत्यू येणार नाही. पंतप्रधान मोदींना सत्तेवरून हटवेपर्यंत मी जिवंत राहीन…’’ असे खरगे यांनी सांगितले.
हेही वाचा >>> हेजबोलाचा आणखी एक नेता ठार; इस्रायलचे लेबनॉनवरील हल्ले सुरूच
जम्मू : जम्मू-काश्मीर विधानसभा निवडणुकीच्या मतदानाच्या तिसऱ्या व अखेरच्या टप्प्यातील प्रचार रविवारी संध्याकाळी समाप्त झाला. या टप्प्यासाठी मंगळवार, १ ऑक्टोबर रोजी मतदान होणार आहे. या टप्प्यात पाकिस्तान, अनुच्छेद ३७०, दहशतवाद आणि आरक्षणासह विविध मुद्द्यांवर राजकीय पक्षांनी प्रचार केला.
जम्मू, उधमपूर, सांबा आणि जम्मू विभागातील कठुआ आणि उत्तर काश्मीरमधील बारामुल्ला, बांदीपोरा आणि कुपवाडा या सात जिल्ह्यांमधील ४० विधानसभा मतदारसंघांत या टप्प्यासाठी मतदान होणार आहे. माजी उपमुख्यमंत्री व काँग्रेस नेते ताराचंद आणि पीडीपीचे मुझफ्फर बेग यांच्यासह ४१५ उमदेवार रिंगणात आहेत. याआधीच्या टप्प्यात मतदानाची टक्केवारी चांगली होती. १८ सप्टेंबर रोजी पहिल्या टप्प्यात ६१.३८ टक्के आणि २६ सप्टेंबर रोजी दुसऱ्या टप्प्यात ५७.३१ टक्के मतदान झाले होते. ऑगस्ट २०१९ मध्ये राज्यघटनेचे अनुच्छेद ३७० रद्द केल्यानंतर जम्मू व काश्मीरमधील ही पहिली विधानसभा निवडणूक आहे. निवडणुकीचे निकाल ८ ऑक्टोबर रोजी जाहीर होणार आहेत.
© The Indian Express (P) Ltd