‘दुसऱ्या बोफोर्स’ची सीबीआय चौकशी होणार

अँटनी यांची घोषणा
इटलीच्या सरकारी मालकीच्या विमाननिर्मिती कंपनीचा मालक जोजफ ओर्सी याला लाच दिल्याप्रकरणी अटक करण्यात आल्याचे वृत्त पसरताच मंगळवारी केंद्रीय संरक्षण मंत्री ए. के. अँटनी यांनी या कराराची संपूर्ण चौकशी केंद्रीय गुन्हे अन्वेषण विभागातर्फे करण्यात येईल, अशी घोषणा केली. या प्रकरणाचा कोणताही तपशील संरक्षण मंत्रालयास प्राप्त झालेला नसून, सीबीआय चौकशीतच याबाबतचे सत्य बाहेर येईल, असे स्पष्ट केले.
ओर्सी हा इटलीच्या संरक्षण आणि अंतरीक्ष वाहननिर्मिती उद्योगातील बडी कंपनी असलेल्या फिनमेक्कानिका या कंपनीचा मुख्य होता. सोमवारी ओर्सी याला आंतरराष्ट्रीय भ्रष्टाचाराच्या आरोपाखाली अटक करण्यात आली. भारत सरकारला करण्यात आलेल्या १२ हेलिकॉप्टरांच्या विक्री करारासाठी भारतीयांना सुमारे पाच कोटी युरो अर्थात ३६२ कोटी रुपयांची लाच दिल्याचा आरोप ओर्सी याच्यावर आहे. फिनमेक्कानिका या कंपनीचीच सहकारी कंपनी असलेल्या ऑगस्टावेस्टलँड या कंपनीलाच हे कंत्राट मिळावे म्हणून एकूण कंत्राटाच्या १० टक्के इतकी रक्कम लाच म्हणून दिली असल्याचा संशय इटलीतील तपास अधिकाऱ्यांनी व्यक्त केला आहे. दरम्यान ऑगस्टावेस्टलँड कंपनीचे विद्यमान मुख्य कार्यकारी अधिकारी ब्रुनो स्पॅग्नोलिनी याना स्थानबद्ध करण्यात आले आहे.