सुरक्षा यंत्रणेत त्रुटी! सरकारने कबुली दिल्याचा विरोधकांचा दावा, सर्वपक्षीय बैठकीत प्रत्युत्तरासाठी एकमुखी पाठिंबा

बैसरनमध्ये पर्यटकांचा ओढा लक्षात घेऊन या भागात पोलीस व केंद्रीय राखीव पोलीस दल (सीआरपीएफ) तैनात केले जाते. मग, यावेळी या यंत्रणा कुठे होत्या, असा प्रश्न लोकसभेतील विरोधी पक्षनेते राहुल गांधींनी उपस्थित केला. संरक्षणमंत्री राजनाथ सिंह यांच्या (पान ११ वर)

अध्यक्षतेखाली झालेल्या या बैठकीला केंद्रीयगृहमंत्री अमित शहा, परराष्ट्रमंत्री एस. जयशंकर, अर्थमंत्री निर्मला सीतारामन, संसदीय कार्यमंत्री किरेन रिजिजू तसेच लोकसभेतील विरोधी पक्षनेते राहुल गांधी, राज्यसभेतील विरोधी पक्षनेते मल्लिकार्जून खरगे यांच्यासह बहुतांश सत्ताधारी तसेच विरोधी पक्षांचे सदस्य उपस्थित होते. सुरूवातीला गुप्तचर संस्थेच्या अधिकाऱ्यांनी २० मिनिटे घटनेबाबत तपशिलावर माहिती दिली. त्यानंतर विरोधी पक्षांनी त्यांना अनेक प्रश्न विचारले. गरज पडेल तेव्हा शहा मध्यस्थी करून प्रश्नांना उत्तरे देत होते, अशी माहिती सूत्रांनी दिली. पाकिस्तानची नाकाबंदी करण्याबाबत उचललेल्या पावलांची माहितीही यावेळी देण्यात आली. त्यानंतर देशाच्या हितासाठी केंद्र सरकारकडून घेतल्या जाणाऱ्या निर्णयांना सर्व पक्षांचा पाठिंबा असेल असे आश्वासन विरोधी पक्षांनी दिल्याचे तृणमूल काँग्रेसचे खासदार सुदीप बंडोपाध्याय यांनी सांगितले.

अमरनाथ यात्रेवेळी बैसरनला पर्यटक जातात. त्यामुळे तेथे जूनपासून सुरक्षाव्यवस्था तैनात असते. पण, एप्रिलपासूनच पर्यटक जाऊ लागले होते. हजारो पर्यटक जात असताना याची माहिती ना पोलिसांना होती ना सैन्य दलांना… केंद्रीय राखीव पोलीस दलालाही (सीआरपीएफ) पर्यटक बैसरनला जात असल्याचे कळले नाही. गुप्तहेर संस्थांना देखील माहिती नव्हते, असे बैठकीत सांगण्यात आले.