‘आप’ला सरकार स्थापनेसाठी आणखी अवधी

दिल्लीतील सरकार स्थापनेचा तिढा अद्याप सुटलेला नाही. या पाश्र्वभूमीवर बिनशर्त पाठिंबा देणाऱ्या कॉंग्रेस सत्ता स्थापनेसाठी ‘आप’ला आणखी अवधी देऊ इच्छितो, असे केंद्र सरकारच्या वतीने गुरुवारी स्पष्ट करण्यात आले.
पत्रकारांशी बोलताना केंद्रीय गृहमंत्री सुशीलकुमार शिंदे यांनी सांगितले की, दिल्लीत सत्ता स्थापनेसाठी ‘आप’ किती वेळ लावणार याबाबत केंद्राने नायब राज्यपालांकडे विचारणा केली आहे. ही एक लोकशाही प्रक्रिया असून दिल्लीत सरकार स्थापनेसाठी ‘आप’ला लागणारा आणखी वेळ देण्यास आपण तयार असल्याचे शिंदे यांनी सांगितले. शिंदे यांच्या स्पष्टीकरणामुळे दिल्लीत राष्ट्रपती राजवट लागू करण्याबाबत केंद्र सरकारला कोणतीही घाई नसल्याचे दिसून येते. भाजप आणि ‘आप’नेही सरकार स्थापनेबाबत निर्णय न घेतल्यामुळे नायब राज्यपाल यांनी दिल्लीत राष्ट्रपती राजवट लागू करण्याबाबत केंद्राला सांगितले आहे.
दिल्लीत नुकत्याच पार पडलेल्या विधानसभा निवडणुकीत कोणत्याही पक्षाला बहुमत प्राप्त झालेले नाही. या निवडणुकीत भाजपला ३२, आम आदमी पक्षाला (आप) २८ जागा, तर कॉंग्रेसला आठ जागांवर समाधान मानावे लागले आहे. भाजपने सत्तास्थापनेसाठी नकार दिल्यानंतर नायब राज्यपालांनी ‘आप’ला सत्ता स्थापनेसाठी विचारले आहे. त्यावर कॉंग्रेसनेही ‘आप’च्या १८ मागण्या मान्य करून बाहेरून पाठिंबा देण्याची तयारी दर्शविली आहे. मात्र त्यानंतरही ‘आप’ने सरकार स्थापनेचा निर्णय घेतलेला नसून दिल्लीतील नागरिकांशी चर्चा करूनच पुढील भूमिका निश्चित करणार असल्याचे पक्षाने जाहीर केले आहे. ‘आप’ रविवापर्यंत आपला निर्णय जाहीर करण्याची शक्यता आहे. त्यामुळे सोमवापर्यंत थांबण्यास केंद्र तयार असल्याचेही शिंदे यांनी स्पष्ट केले.