Salman Khan: अभिनेता सलमान खानच्या वांद्रे येथील गॅलेक्सी अपार्टमेंटच्या घराबाहेर गोळीबार करण्यात आला. या प्रकरणात आता चार्जशीट दाखल करण्यात आली आहे. या चार्जशीटमध्ये असलेल्या माहितीनुसार गँगस्टर लॉरेन्स बिश्नोईचा लहान भाऊ अनमोल याने सलमान खानच्या घराबाहेर गोळीबार करणाऱ्या दोन शूटर्सशी काय संवाद साधला होता ते समोर आलं आहे. या दोन्ही शूटर्सना हा संदेश देण्यात आला होता की असा गोळीबार झाला की सलमान खान ( Salman Khan ) घाबरला पाहिजे.
विक्की कुमार गुप्ता आणि सागर पाल या दोघांना अटक
सलमान खानच्या ( Salman Khan ) घराबाहेर गोळीबार करणाऱ्या सागर पाल आणि विक्की गुप्ता या दोघांना अटक करण्यात आली. या दोघांनी १४ एप्रिलच्या पहाटे सलमानच्या घराबाहेर गोळीबार केला. या घटनेची विशेष चौकशी करण्यात आली. तपासा दरम्यान या दोघांना अटक करण्यात आली. त्यानंतर मोक्का न्यायलया समोर या प्रकरणातलं १७३५ पानांचं चार्जशीट दाखल करण्यात आलं. या प्रकरणात जी चार्जशीट दाखल करण्यात आली, त्यात एक ऑडिओ संभाषणही मिळालं आहे. हे संभाषण अनमोल बिश्नोई आणि शूटर विक्की गुप्ता यांच्यातलं आहे.
हे पण वाचा- “तुम्ही जेव्हा आई-वडील व्हाल…”, बॉलीवूडच्या भाईजानची अनंत-राधिकासाठी खास पोस्ट
सलमानच्या घरावर गोळीबार करण्याआधी बिश्नोई आणि शूटर्स यांच्यातलं संभाषण काय?
चार्जशीटमध्ये समोर आलेल्या माहितीनुसार, अनमोलने शूटर्सना सांगितलं एक मिनिटापेक्षा जास्त वेळ गोळीबार करा, गोळीबार इतका झाला पाहिजे की सलमानला ( Salman Khan ) भीती वाटली पाहिजे. तसंच अनमोलने विक्कीला विचारलं तू सिगारेट ओढतोस का? तो म्हणाल्यावर अनमोल म्हणाला ठीक आहे गोळीबार करताना सिगारेट ओढ, सीसीटीव्हीत तू सिगारेट ओढत गोळीबार करताना दिसशील याचा अर्थ असा लावला जाईल की तू एक निडर माणूस आहे. तुम्ही दोघांनी जर हे काम केलं तर तुम्ही इतिहास रचाल आणि तुमचं नाव मीडियात घेतलं जाई असंही बिश्नोईने या दोघांना सांगितलं. अशी माहिती चार्जशीटमध्ये आहे.
इतर तीन आरोपी न्यायालयीन कोठडीत
सलमान खानच्या घरावर विक्की गुप्ता, सागर पाल यांच्यासह सोनू कुमार बिश्नोई, मोहम्मद रफीक चौधरी आणि हरपाल सिंग यांनाही न्यायालयीन कोठडी सुनावण्यात आली आहे.
१५ एप्रिलच्या रात्री दोन आरोपींना अटक
१४ एप्रिलच्या रविवारी पहाटे गॅलेक्सी अपार्टमेंटबाहेर गोळीबार करून विकी गुप्ता (२४) आणि सागर पाल (२१) पसार झाले होते. हे दोघेही बिहारचे रहिवासी आहेत. त्यांना १५ एप्रिल रात्री उशिरा गुजरातमधील माता नो मध गावातून अटक करण्यात आली. यासंदर्भात पोलिसांनी पत्रकार परिषद घेत माहिती दिली. पोलिसांनी दिलेल्या माहितीनुसार, या घटनेच्यावेळी विकी गुप्ता दुचाकी चालवत होता आणि त्याच्या मागे बसलेल्या सागर पालने सलमानच्या घरावर गोळीबार केला.
