शांतिनिकेतनच्या फलकावरून रवींद्रनाथ टागोरांचं नाव गायब; ममता बॅनर्जींची संतप्त प्रतिक्रिया, म्हणाल्या…

संबंधित फलकावर रवींद्रनाथ टागोर यांचा उल्लेख नसल्याने पश्चिम बंगालच्या मुख्यमंत्री ममता बॅनर्जी आक्रमक झाल्या आहेत. शुक्रवारी (२७ ऑक्टोबर) सकाळी दहा वाजेपर्यंत संबंधित फलक बदलला नाही तर व्यापक निदर्शने केली जातील, असा इशारा ममता बॅनर्जी यांनी दिला. तसेच संबंधित फलकावर रवींद्रनाथ टागोर यांचं नाव न लिहिल्याने विद्यापीठाच्या अधिकाऱ्यांवर बॅनर्जी यांनी टीका केली.

“रवींद्रनाथ टागोर यांच्यामुळेच शांतिनिकेतनला युनेस्कोचा टॅग मिळाला आणि तुम्ही वारसा स्थळाच्या फलकावरून त्यांचंच नाव काढून टाकलं. राज्यात
दुर्गापूजा उत्सव सुरू होता, त्यामुळे आम्ही गप्प होतो. पण उद्या (२७ ऑक्टोबर) सकाळी दहा वाजेपर्यंत तुम्ही हा फलक काढून नोबेल पारितोषिक विजेते रवींद्रनाथ टागोर यांच्या नावाचा दुसरा फलक लावला नाही, तर आमचे लोक योग्य ते प्रात्यक्षिक सुरू करतील,” अशा शब्दांत ममता बॅनर्जींनी इशारा दिला आहे. त्या कोलकाता येथे पत्रकार परिषदेत बोलत होत्या.