Congress : तेलंगणामध्ये काँग्रेस पक्षात अंतर्गत कलह सुरू असल्याची जोरदार चर्चा राजकीय वर्तुळात सुरू आहे. यादरम्यान आगमी स्थानिक स्वराज्य संस्थांच्या निवडणुकीच्या तोंडावर काँग्रेसच्या १० आमदारांनी एक गुप्त बैठक घेतल्याची माहिती समोर आली आहे. यामुळे काँग्रेसच्या शीर्ष नेतृत्वाच्या चिंता वाढल्या आहेत. हैदराबादच्या बाहेरील गंडीपेट येथील आमदार अनिरुद्ध रेड्डी यांच्या फार्महाऊसवर बंद दाराआड चर्चा झाली.
कंत्राटदारांनी केलेल्या कामाची बिले मंजूर करण्यासाठी लाच मागणाऱ्या दोन मंत्र्यांबद्दल चर्चा करण्यासाठी ही बैठक झाल्याचे सांगितले जात आहे. सध्या काँग्रेसमध्ये तेलंगणाचे माहिती व जनसंपर्क मंत्री पोंगुलेती श्रीनिवास रेड्डी (Ponguleti Srinivas Reddy) यांच्या विरोधात विशेष पक्षांतर्गत नाराजी वाढताना दिसत आहे.
बैठकीला कोण कोण आमदार उपस्थित होते?
१. नैनी राजेंद्र रेड्डी
२. भूपती रेड्डी
३. येन्नम श्रीनिवास रेड्डी
४. मुरली नाईक
५. कुचाकुल्ला राजेश रेड्डी
६. संजीव रेड्डी
७. अनिरुद्ध रेड्डी
८. लक्ष्मी कांता राव
९. डोंथी माधव रेड्डी
१०. बीर्ला इलाह
यादरम्यान मुख्यमंत्री रेवंत रेड्डी यांनी पक्षातील वाढत्या असंतोषाच्या संदर्भात, विशेषत: पोंगुलेती श्रीनिवास रेड्डी यांच्याविरोधात पक्षाच्या कमांड कंट्रोल सेंटरमध्ये मंत्र्यांची भेट घेणार आहेत. या घटनेचे गांभिर्य लक्षात घेऊन पोंगुलेती यांनी त्याचा पालेर दौरा देखील रद्द केला आहे.
सीएम रेवंत रेड्डी यांनी परिस्थितीचे गांभीर्य लक्षात घेऊन अधिकाऱ्यांना अशा गुप्त बैठकांना उपस्थित न राहण्याचे कठोर निर्देश दिले आहेत. इंडिया टुडेला यासंबंधीचे वृत्त दिले आहे. स्थानिक स्वराज्य संस्था आणि एमएलसी निवडणुकींपूर्वी आमदारांच्या बंडखोरीमुळे जनतेत चुकीचा संदेश जाऊ शकतो, अशी भीती पक्षाच्या हायकमांडला वाटत असल्याची माहिती सुत्रांनी इंडीया टुडेला दिली.
तेलंगणा येथे स्थानिक स्वराज्य संस्था आणि विधानपरिषदेच्या निवडणुका होणार आहे. पदवीधर आणि दोन शिक्षक मतदारसंघात देकील २७ फेब्रुवारी रोजी निवडणूक होणार आहे. या निवडणुकीचे निकाल ३ मार्च रोजी जाहीर केले जातील.
