“तिला धडा शिकवेन”, रश्मिका मंदानाबद्दल वादग्रस्त वक्तव्य करणाऱ्या काँग्रेस आमदाराची सारवासारव; म्हणाले, “तिच्यावर हल्ला…”

या आमदाराचं नाव रवी गनिगा असं असून त्यांनी रश्मिकाला धडा शिकवण्याबाबतचं वक्तव्य केलं होतं. त्यानंतर अनेक सेलिब्रिटी व विरोधी पक्षांमधील नेत्यांनी रवी गनिगा यांच्या वक्तव्याचा समाचार घेतला. सर्व स्तरातून टीका सुरू झाल्यानंतर गनिगा यांना घडल्या प्रकारावर स्पष्टीकरण द्यावं लागलं आहे.

रश्मिकाबद्दल केलेल्या वक्तव्यावर रवी गनिगा यांनी स्पष्टीकरण दिलं आहे. एएनआयशी बातचीत करत असताना रवी गनिगा म्हणाले, “मी म्हणालो की मी तिला धडा शिकवेन याचा अर्थ असा नव्हे की मी तिला काही इजा पोहोचवेन. किंवा तिच्यावर वैयक्तिक पातळीवर हल्ला करण्याचं माझं उद्दीष्ट नव्हतं. माझं तिला केवळं एवढंच सांगणं होतं की तू ज्या शिडीच्या सहाय्याने इतक्या उंचीवर पोहोचली आहेस ती शिडी, त्या पायऱ्या विसरू नकोस. त्या शिडीवर लाथ मारू नकोस. तसं केलंस तर तू खाली पडशील. मला तिला एवढंच सांगायचं होतं की तू तुझ्या राज्याचा सन्मान राखायला हवा. मी रश्मिकाचे चित्रपटही पाहिले आहेत. मी माझ्या वक्तव्यावर ठाम आहे. मी माझे शब्द, माझं राज्य, माझी भूमी आणि माझ्या कन्नड भाषेच्या सन्मानासाठी भूमिका घेत राहणार, बोलत राहणार.”

“त्या बातम्या पूर्णपणे खोट्या…”, काँग्रेस आमदाराच्या दाव्यावर रश्मिकाचं भाष्य

रवी गनिगा यांनी बंगळुरू आंतरराष्ट्रीय चित्रपट महोत्सवात सहभागी होण्यास रश्मिकाने नकार दिल्याचा आरोप केला होता. तसेच ज्या इंडस्ट्रीमधून (कन्नड) तिने तिच्या कारकि‍र्दीची सुरुवात केली, त्याकडे दुर्लक्ष केल्याबद्दल तिला धडा शिकवू नये का? असा थेट प्रश्न उपस्थित केला होता. त्यानंतर रश्मिकाच्या टीमने हे सर्व आरोप ‘पूर्णपणे खोटे’ असल्याचं म्हटलं आहे.