विद्यार्थ्याच्या डब्यातील ‘चिकन सँडविच’वरून पेटला व्हेज-नॉन व्हेज वाद

शाळेच्या मधल्या सुट्टीत एका विद्यार्थ्याने दुसऱ्या विद्यार्थ्याला (जो शाकाहारी होता) आपल्या डब्ब्यातील चिकन सँडविच खाण्यास दिलं. त्यानंतर अन्य विद्यार्थ्यांनी चिकन सँडविच खायला देणाऱ्या विद्यार्थ्याला मारहाण केली. पण, ज्याला चिकन सँडविच दिलं तो शाकाहारी असल्याचं माहित नव्हतं असं त्या विद्यार्थ्याचं म्हणणं होतं. अखेर शाळा प्रशासनाला यामध्ये हस्तक्षेप करावा लागला आणि वर्गात मांसाहारी डब्बा आणणाऱ्यांनी आपला डब्बा इतरांसोबत वाटप करुन खाऊ नये अशी नोटीस जारी करावी लागली. टाइम्स ऑफ इंडियाच्या वृत्तानुसार, या घटनेमुळे इतर काही शाळांमध्येही टिफिन बॉक्सबाबत नियमावली बनवावी अशी मागणी होत आहे. काही शाळांनी तर स्पष्टपणे शाळेत मांसाहार घेऊन येऊ नये असं सांगितलं आहे, याशिवाय काही शाळांनी मांसाहारी डब्बा आणला असेल तर त्याची पूर्वकल्पना बरोबरीच्या मुलांना द्यावी अशी सूचना केली आहे. तर अन्य काही शाळांनी मासळी आणि अंडे आणण्याची परवानगी दिली आहे.