शिक्षणासाठी भारतातून युक्रेनमध्ये गेलेल्या विद्यार्थ्यांना भारतात सुखरुप परत आणा असे पंतप्रधानांना ट्वीट करुन सांगितले होते पण त्यांना उत्तर प्रदेश आणि इतर निवडणुकांपेक्षा या देशात काहीच महत्वाचे वाटत नाही असा टोला राष्ट्रवादी काँग्रेसचे प्रदेशाध्यक्ष आणि जलसंपदा मंत्री जयंत पाटील यांनी लगावला आहे. युक्रेनमध्ये युध्द सुरू झाले असून भारतातील विद्यार्थी अडकले असल्याच्या पार्श्वभूमीवर बोलताना जयंत पाटील यांनी केलेल्या ट्वीटची आठवण करून दिली.
ज्यावेळी निवडणूका देशात सुरू होतात त्यावेळी केंद्र सरकारमध्ये काम करणाऱ्या लोकांना कशातच रस नसतो असा अनुभव आहे असा आरोपही जयंत पाटील यांनी केला. “युक्रेन मध्ये आपले विद्यार्थी अडकले आहेत. या विद्यार्थ्यांना लवकरात लवकर परत आणा असे आठ दिवसापूर्वी केंद्र सरकारच्या प्रमुखांचे लक्ष ट्वीटच्या माध्यमातून वेधले होते परंतु कोणतीच कार्यवाही झाली नाही,” असेही जयंत पाटील म्हणाले.
“युक्रेन मध्ये कालपासून युध्द सुरू झाले आहे. या संकटात विद्यार्थी सापडले आहेत. मी ट्वीट करुन मागणी केली त्याचवेळी प्रयत्न केला असता तर आज विद्यार्थी सुरक्षित राहिले असते. आज ते असुरक्षित आहेत. याची नोंद अगोदरच घ्यायला हवी होती पण केंद्र सरकारने घेतली नाही. आतातरी नोंद घेतील,” असे जयंत पाटील म्हणाले.
युक्रेनमध्ये मोठ्या संख्येने भारतीय विद्यार्थी वैद्यकीय शिक्षण घेत आहेत. युक्रेनमध्ये सुमारे २०,००० भारतीय राहतात. रशियाने युक्रेनवर आक्रमण करण्यापूर्वी त्यापैकी काहींनी आधीच युक्रेन सोडले होते. मात्र हवाई क्षेत्र बंद झाल्यामुळे अनेक लोक अजूनही अडकून पडले आहेत. हवाई क्षेत्र बंद झाल्यामुळे एअर इंडियाच्या विमानाला परतावे लागले. त्यामुळे अशा परिस्थितीत सरकार विद्यार्थ्यांना भारतात परत आणण्याची योजना आखत आहे.
