छत्तीसगडमध्ये पहिल्या टप्प्यातील मतदान आज ( ७ नोव्हेंबर ) पार पडत आहे. २० जागांसाठी ६०० हून अधिक केंद्रावर मतदान पार पडत आहे. यासाठी चोख सुरक्षाही तैनात करण्यात आली आहे. अशातच सुकमा जिल्ह्यात बॉम्बस्फोट झाला आहे. यामध्ये सीआरपीएफचा एक जवान जखमी झाला आहे.
श्रीकांत असं जखमी झालेल्या जवानाचं नाव आहे. श्रीकांत यांच्या पायाला दुखापत झाली आहे. त्यांच्यावर सध्या उपचार सुरू आहेत, अशी माहिती पोलीस अधिकारी किरण चव्हाण ‘इंडिया टुडे’ला यांनी दिली.
हेही वाचा : “मीच ‘महादेव’ बेटिंग अ‍ॅपचा मालक, भूपेश बघेल यांच्या सांगण्यावरून…”, फरार आरोपीचा दुबईतून खळबळजनक दावा
किरण चव्हाण म्हणाले, “क्रोब्रा २०६ आणि सीआरपीएफचे जवान टोंडामार्का येथून एलमागुंडा गावाकडे गस्तीसाठी जात होते. तेव्हा नक्षलवाद्यांनी जमिनीत पेरलेल्या आयईडी बॉम्बवर श्रीकांत यांचा पाय पडला. त्यामुळे बॉम्बस्फोट आणि श्रीकांत यांच्या पायाला दुखापत झाली आहे. श्रीकांत यांच्यावर उपचार सुरू असून प्रकृती स्थिर आहे.
हेही वाचा :“भाजपा स्वबळावर निवडणूक लढवू शकत नाही, म्हणून…”, भूपेश बघेल यांची टीका
दरम्यान, दोन दिवसांतील आयईडी बॉम्बस्फोटाची ही दुसरी घटना आहे. सोमवारीही कांकेरमध्ये आयईडी बॉम्बस्फोट झाला होता. यामध्ये सीमा सुरक्षा दलाचे हवालदार आणि मतदान अधिकारी जखमी झाले होते. त्यांच्या पायाला दुखापत झाल्यानं छोटेपेठिया येथील रूग्णालयात दाखल करण्यात आलं आहे.
