उत्तर प्रदेशात योगी आदित्यनाथ यांना भेटायला येण्यापूर्वी दलित समाजातील लोकांना आंघोळ करून येण्याचा फतवा काढण्याच्या निर्णयाचा गुजरातमधील डॉ. आंबेडकर वेचन प्रतिबंध समितीकडून अभिनव पद्धतीने निषेध करण्यात येणार आहे. त्यासाठी या संघटनेकडून योगी आदित्यनाथ यांना तब्बल १६ फुटांचा साबण पाठवण्यात येणार आहे. जेणेकरून दलितांना भेटण्यापूर्वी योगी आदित्यनाथ यांना आंघोळ करता येईल, असा टोला या संघटनेने लगावला आहे.
योगी आदित्यनाथ यांनी स्वत:ची मनुवादी मनोवृत्ती दाखवून दिली आहे. त्यांच्यामधील ही अशुद्धता दूर झाली पाहिजे, असे संघटनेचे सदस्य किर्ती राठोड आणि कांतीलाल परमार यांनी सांगितले. दरम्यान, योगी आदित्यनाथ यांना हा साबण पाठवण्यापूर्वी ९ जूनपर्यंत तो अहमदाबाद येथे प्रदर्शनासाठी ठेवला जाणार आहे. वाल्मिकी समाजातील महिला हा साबण तयार करणार आहेत, अशीही माहिती संघटनेतर्फे देण्यात आली.
साबण, शॅम्पूने आंघोळ करूनच योगी आदित्यनाथांना भेटायला या; अधिकाऱ्यांचा फतवा
काही दिवसांपूर्वी उत्तर प्रदेशच्या कुशीनगर येथे योगी आदित्यनाथ यांचा कार्यक्रम आयोजित करण्यात आला होता. यावेळी स्थानिक अधिकाऱ्यांकडून एक अजब फर्मान काढण्यात आले होते. योगी आदित्यनाथ यांना भेटायला येताना लोकांच्या अंगाला चांगला वास आला पाहिजे. त्यामुळे लोकांनी योगी आदित्यनाथ यांना भेटण्यापूर्वी साबण, शॅम्पू लावून स्वच्छ आंघोळ करून या. पावडर लावा आणि सेंटही मारा, असे फर्मान काढले होते. त्यासाठी योगी आदित्यनाथ यांच्या कार्यकर्त्यांकडून गावकऱ्यांना साबण, शॅम्पू आणि सेंटचे वाटपही करण्यात आले होते. उत्तर प्रदेशच्या कुशीनगर जिल्ह्यातील मैनपूर कोट गावात २५ मे रोजी योगींचा दौरा आयोजित करण्यात आला होता. येथील मुसहर परिसरात आदित्यनाथांच्या हस्ते इन्सेफेलायटीस लसीकरण मोहिमेला सुरूवात होणार होती. त्यांच्या दौऱ्यापूर्वी अधिकाऱ्यांनी संपूर्ण परिसराची पाहणी केली. यावेळी अधिकाऱ्यांनी मुख्यमंत्री योगी आदित्यनाथ यांना भेटण्यापूर्वी स्वच्छ आंघोळ करून सेंट मारून या, असे सक्त आदेशच दिले होते.
