मोदी सरकारला अस्थिर करण्याचा दाऊदचा कट!

एका इंग्रजी वृत्तपत्राने दिलेल्या वृत्तानुसार, ‘एनआयए’कडून दाऊदच्या गँगमधील दहा गुंडांविरोधात शनिवारी आरोपपत्र दाखल करण्यात येणार असून, मोदी सरकार सत्तेत आल्यावर देशात लगेच सामाजिक अस्थिरता निर्माण करण्याचे काम या गुंडांना देण्यात आले होते, अशी खळबळजनक माहिती समोर आली आहे. मोदी सरकार सत्तेत आल्यापासूनच म्हणजेच २०१४ पासूनच ‘डी कंपनी’ने संघ नेते आणि चर्चेसना निशाणा बनविण्याचा कट रचला होता. याच कटाचा भाग म्हणून २ नोव्हेंबर २०१५ रोजी गुजरातमधील डाव्या विचारसरणींच्या दोन नेत्यांची हत्या करण्यात आली होती. मारेकऱयाला पकडण्यात यश देखील आले होते. याकूब मेमनच्या फाशीचा बदला घेण्यासाठी या नेत्यांना ठार केल्याचा दावा मारेकऱयाने केला होता. पुढे चौकशी दरम्यान, एनआयएच्या अधिकाऱयांना मोठ्या कटाचा उलगडा झाला. देशातील धार्मिक नेते, स्वयंसेवक संघातील नेते आणि चर्चेसवर हल्ला चढविण्याच्या विचारात ‘डी-कंपनी’चे सदस्य होते, अशी माहिती समोर आली.