लिव्ह-इनमध्ये राहणाऱ्या तरुणीचा संशयास्पद मृत्यू; रस्त्यालगत आढळला मृतदेह, भाऊ म्हणाला, “एक कोटी रुपयांसाठी…”

मृत तरुणीचे नाव गीता शर्मा असल्याचे सांगितले जाते. ज्या रस्त्यालगत ती बेशूद्ध अवस्थेत आढळली होती, तिथेच एका सोसायटीत ती राहत होती. तरुणीचा भाऊ लालचंदने गीता शर्माचा लिव्ह इन जोडीदार गिरीजा शंकरवर खूनाचा आरोप करत त्याच्याविरोधात गुन्हा दाखल केला आहे. पोलीस उपायुक्त पंकज सिंह यांनी सांगितले की, तरुणीच्या शरीरावर अनेक जखमा झाल्या होत्या, अतिरिक्त रक्तस्त्राव होऊन तिचा मृत्यू झाला. या जखमा अपघातामुळे झाल्या होत्या की तिचा कुणी खून केला, याचा आम्ही तपास करत आहोत.

पोलिसांनी पुढे माहिती देताना सांगितले की, गीता शर्मा ही मूळची रायबरेली येथे राहणारी होती. प्रॉपर्टी डिलर म्हणून काम करणारी गीता पीजीआय परिसरात एका सोसायटीमध्ये राहत होती. गिरीजा शंकरने माझ्या बहिणीचा अपघात झाल्याची चुकीची माहिती आम्हाला दिली आणि आमची दिशाभूल केली, असा आरोप गीता शर्माचा भाऊ लालचंदने केला.

लालचंदने पुढे सांगितले की, गीता शर्माने १ कोटीचा आयुर्विमा काढला होता. ज्यामध्ये गिरीजा शंकर हा नॉमिनी होता. विम्याची रक्कम मिळविण्यासाठी माझ्या बहिणीचा खून झाला असावा, असा संशय त्याने व्यक्त केला.