Delhi Assembly Session 2025 : ‘शीशमहल’, मद्य घोटाळ्याशी संबंधित कॅगचा अहवाल दिल्ली विधानसभेत सादर, यासह महत्त्वाच्या घडामोडी

आम आदमी पक्षाला मद्य धोरण बदलण्यापूर्वी काही तज्ज्ञांनी महत्त्वाचे सल्ले दिले होते. मात्र त्यातला कुठलाही सल्ला विचारांत घेतला गेला नाही. तज्ज्ञांच्या समितीने दिलेल्या अहवालाकडे डोळेझाक करण्यात आली. असंही कॅगच्या अहवालात नमूद करण्यात आलं आहे.

कॅग अहवालातले ठळक मुद्दे काय?

नव्या महसूल धोरणामुळे दिल्ली सरकारला २००० कोटींचं नुकसान झालं

नव्या मद्य धोरणाच्या आधी एका व्यक्तीला एकच परवाना मिळत होता. नव्या धोरणानुसार एक व्यक्ती दोन डझन परवाने घेण्यास पात्र होता.

दिल्लीत नव्या मद्य धोरणाच्या आधी ६० टक्के मद्य विक्री ही चार सरकारी कॉर्पोरेशनद्वारे केली जात होती. नव्या धोरणानंतर खासगी कंपन्यांनी विक्री परवाने घेतले.

मद्य विक्रीचं कमिशन ५ वरुन १२ टक्के करण्यात आलं.

परवाने देण्यापूर्वी संबंधित व्यक्ती, कंपनीची आर्थिक आणि गुन्हे नोंद आहेत का याची माहिती घेण्यात आली नाही.

दिल्ली विधानसभेच्या निवडणुकीत भारतीय जनता पक्षाला मिळालेल्या बहुमतानंतर दिल्लीत भारतीय जनता पक्षाचं सरकार स्थापन झालं, तर आम आदमी पक्षाला मोठ्या पराभवाला सामोरं जावं लागल्यामुळे दिल्लीत ‘आप’ विरोधी पक्षाच्या भूमिकेत आहे. नवीन सरकार स्थापन झाल्यानंतर सोमवारपासून दिल्लीत विशेष अधिवेशन सुरु झालं आहे. या अधिवेशनाच्या पहिल्या आणि दुसऱ्या दिवशी मोठा गदारोळ पाहायला मिळाला. दिल्लीच्या मुख्यमंत्री रेखा गुप्ता यांच्या कार्यालयामधून शहीद भगतसिंग आणि डॉ.बाबासाहेब आंबेडकर यांचे फोटो हटवल्याचा दावा विरोधी पक्षनेत्या अतिशी यांनी केला. यावरून चांगलंच राजकारण तापलं. यातच आज (२५ फेब्रुवारी) दिल्ली सरकारने कॅगचा अहवाल विधानसभेत सादर केला आहे. या अहवालात ‘आप’ सरकारच्या कारभाराच्या संदर्भात मोठा खुलासा करण्यात आला आहे.

वाचा सविस्तर

दिल्ली विधानसभेत कॅगचा जो अहवाल सादर झाला त्या कॅगच्या अहवालात असं म्हणण्यात आलं आहे की मद्य धोरणामुळे दिल्ली सरकारचं २ हजार कोटींहून अधिक नुकसान झालं. स्थानिक परवान्यांमध्ये सूट दिली गेल्याने ९४१ कोटींचं नुकसान झालं. तर निविदा न काढल्याने सुमारे ८९० कोटींचं नुकसान झालं.

“भाजपाने त्यांचा खरा चेहरा संपूर्ण देशाला सोमवारी दाखवला. दिल्ली विधानसभा आणि दिल्ली सचिवालय या ठिकाणी असलेल्या मुख्यमंत्री कार्यालय आणि इतर कार्यालयांमध्ये असलेले डॉ. बाबासाहेब आंबेडकर यांचे फोटो हटवून त्या ठिकाणी पंतप्रधान मोदींचा फोटो लावण्यात आला आहे. भाजपाच्या लोकांना वाटतं की पंतप्रधान नरेंद्र मोदी हे डॉ. बाबासाहेब आंबेडकरांची जागा घेऊ शकतात त्यामुळेच हे करण्यात आलं.”

दिल्लीचे उपराज्यपाल वी. सक्सेना यांचं भाषण सुरु असताना आम आदमी पक्षाच्या आमदारांनी गदारोळ घालण्यास सुरुवात केली. ज्यानंतर विधासभेच्या अध्यक्षांनी विधासभेच्या विरोधी पक्ष नेत्या आतिशी यांच्यासह आम आदमी पक्षाच्या १२ आमदारांचं निलंबन केलं. हे निलंबन २४ तासांसाठी करण्यात आलं आहे.