दिल्लीचे मुख्यमंत्री अरविंद केजरीवाल यांनी मद्यधोरण घोटाळ्यात त्यांना केलेल्या अटकेचा निषेध नोंदवत जामीन मिळावा म्हणून न्यायालयात अर्ज केला आहे. आम आदमी पार्टीचे संस्थापक आणि दिल्लीचे मुख्यमंत्री अरविंद केजरीवाल यांनी आपल्या याचिकेत सीबीआयवर गंभीर आरोप केले आहेत. अरविंद केजरीवाल हे सध्या मद्य घोटाळा प्रकरणात आणि आर्थिक गैरव्यवहार प्रकरणात अडकले आहेत. त्यांच्यावर ईडी आणि सीबीआयने कारवाई केली आहे. मात्र आपल्या अटकेच्या निर्णयाला त्यांनी उच्च न्यायालयात आव्हान दिलं आहे.
अरविंद केजरीवाल यांनी याचिकेत काय म्हटलंय?
अरविंद केजरीवाल यांनी सीबीआयवर गंभीर आरोप केले आहेत. त्यांनी याचिकेत म्हटलं आहे की एप्रिल २०२३ मध्ये जेव्हा मला चौकशीसाठी बोलवण्यात आलं तेव्हा मी त्यांना सहकार्य करण्याची तयारी दर्शवली होती. मात्र मला वारंवार त्रास देण्यात आला. सीबीआय चौकशीच्या नावाखाली मला किती मानसिक त्रास देता येईल हेच सीबीआयने पाहिलं. सीबीआयची वागणूक हा माझा मानसिक छळ आहे याला दुसरं काहीही म्हणता येणार नाही. तसंच माझी चौकशी पूर्ण झाली आहे असंही त्यांनी म्हटलं आहे.
सीबीआयसारखी संस्था कायदेशीर प्रक्रियेशी खेळ करते आहे
सीबीआयच्या विरोधात केलेल्या या याचिकेत केजरीवाल म्हणतात, मला अटक करण्यासंबंधीचे पुरावे आधीच रेकॉर्डवर आहेत. सीबीआयसारखी संस्था कायदेशीर प्रकियेशी खेळ करते आहे. सीबीआयचा दृष्टीकोन पक्षपाती आणि एकतर्फी आहे. त्यांनी नि:पक्षपातीपणे काम करणं अपेक्षित आहे. मात्र ते तसं वागताना दिसत नाहीत उलट ते माझा छळ करत आहेत. सीबीआयचे अधिकारी देत असलेली वागणूक ही निष्काळजीपणाची आहे तसंच अधिकाराचं हनन करणारी आहे. माझ्या स्वातंत्र्यावर घाला घालण्याचं काम सीबीआयने केलं आहे. तसंच मला जामीन मिळू नयेत यासाठीही सोयीस्कर प्रयत्न करण्यात आले असाही आरोप अरविंद केजरीवाल यांनी केला आहे. आज तकने हे वृत्त दिलं आहे.
हे पण वाचा- यूपीएससी सूत्र : लोकसभेचे अध्यक्ष-उपाध्यक्ष पद अन् अरविंद केजरीवाल यांना सीबीआयने केलेली अटक, वाचा सविस्तर…
सीबीआयकडून माझा छळ केला जातो आहे
अरविंद केजरीवाल यांनी म्हटलं आहे की माझा छळ केला जातो आहे. ज्या पुराव्यांच्या आधारे मला अटक करण्यात आली ते पुरावे आधीच रेकॉर्डवर आहेत. १ वर्षे १० महिन्यांनी मला अटक केली गेली याबाबतही प्रश्न उपस्थित होतो. कारण जर पुरावे होते तर इतके महिने मला अटक करण्यासाठी वाट का पाहिली गेली? माझी सुटका व्हावी, जामीन मिळावा यासाठी मी जे प्रयत्न करत होतो त्यापासूनही मला रोखण्यात आलं असंही केजरीवाल यांनी म्हटलं आहे. कलम ४१ (१) (ब) चं उल्लंघन करण्यात आलं. मला कैद करतानाही मनमानी पद्धतीने नियम धाब्यावर बसवण्यात आले. सीबीआयने दिलेले जे पुरावे आहेत ते पुरावे एकदा न्यायालयाने पाहिले पाहिजेत, ते आधीपासून रेकॉर्डवर आहेत. त्यात काही आरोपींची नावंही आहेत असंही केजरीवाल यांनी म्हटलं आहे.
