वसईतील २६ वर्षीय श्रद्धा वालकरच्या हत्येनंतर तिचा प्रियकर आफताब पूनावाला याला अटक करण्यात आली आहे. आफताबने श्रद्धाच्या मृतदेहाचे ३५ तुकडे केल्यानंतर दिल्लीत वेगवेगळ्या ठिकाणी फेकून देत त्यांची विल्हेवाट लावली होती. पोलिसांनी आफताबला अटक केली असून जेलमध्येही त्याच्यावर २४ तास पाळत ठेवली जात आहे. या घटनेनंतर दोघांचीही सोशल मीडिया अकाऊंट्स चर्चेत आहेत.
आफताबचं इन्स्टाग्रामवर फूड ब्लॉग अकाऊंट होतं. त्याचे २८ हजार फॉलोअर्स होते. दरम्यान, श्रद्धा मात्र इन्स्टाग्रामवर फार सक्रीय नव्हती. तिचे २७०० फॉलोअर्स होते. तिच्या पोस्टमध्ये भटकंतीचे तसंच स्वत:चे फोटो दिसत आहेत. हत्येच्या एक आठवडाआधी तिने हिमाचल प्रदेशातील आपला एक फोटो शेअर केला होता. या फोटोमध्ये ती पुस्तक वाचताना दिसत आहे. ११ मे रोजी पोस्ट केलेल्या या फोटोला तिने ‘Exploring more and more every passing day’ अशी कॅप्शन दिली आहे.
दरम्यान हत्येच्या १० दिवस आधी श्रद्धाने गंगेच्या किनारी बसलेली एक इन्स्टाग्राम रील पोस्ट केली होती. तिच्या सोशल मीडियावरील पोस्टवरुन तिला भटकंतीची तसंच नवीन ठिकाणं शोधण्याची फार आवड होती हे दिसत आहे.
मुंबईतून दिल्लीला राहायला गेल्यानंतर श्रद्धाने फक्त दोनच पोस्ट शेअर केल्या होत्या. १४ फेब्रुवारी म्हणजेच ‘व्हॅलेंटाइन डे’ला तिने आफताबसोबत फोटो शेअर केला होता. ‘Happy days’ असं कॅप्शन तिने या फोटोला दिल होतं. आफताबसोबत तिने हा एकमेव फोटो शेअर केला आहे.
दरम्यान श्रद्धाचा खून केल्यानंतर कोणालाही संशय येऊ नये यासाठी आफताब तिचं सोशल मीडिया अकऊंट वापरत होता. १८ मे रोजी तिचा गळा दाबून खून केल्यानंतर जवळपास एक महिना तो तिच्या अकाऊंटवरुन पोस्ट करत होता. तसंच ती अद्याप जिवंत आहे हे दाखवण्यासाठी ९ जूनपर्यंत तिच्या मित्रांसोबत चॅटही करत होता.
