सिंगापूरमध्ये गोताबया राजपक्षे यांच्या अटकेची मागणी 

रॉयटर्सने दिलेल्या वृत्तात म्हटले आहे की, आयटीजेपी हा दक्षिण आफ्रिकेतील मानवाधिकार गट आहे. या गटाच्या म्हणण्यानुसार, श्रीलंकेत राजपक्षे यांनी केलेल्या कारवायांबद्दल त्यांच्यावर जगभरात कुठेही खटला दाखल होऊ शकतो. त्यामुळे त्यांच्यावर सिंगापूर येथे कारवाई करण्यात यावी. देशातील आर्थिक-राजकीय पेचप्रसंगानंतर राजपक्षे यांनी सिंगापूरमध्ये पलायन केले आहे. राजपक्षे यांच्याविरुद्ध तक्रारीचा मसुदा तयार केलेले वकील अलेक्झान्डर लिली काथेर यांनी बर्लिन येथून रॉयटर्सला सांगितले की, राजपक्षे यांच्याविरोधात सिंगापूरमध्ये दाखल केलेली फौजदारी तक्रार ही दोन गुन्ह्यांतील वेगवेगळय़ा माहितीवर आधारित असली तरी, त्यातील पुरावा हा त्यांच्याशी जोडला जाणारा आहे.

 सिंगापूरमधील कायदा व धोरणांनुसार आता राजपक्षे यांच्याविरोधात कारवाईची तेथील सरकारला संधी आहे. याबाबत सिंगापूरमधील श्रीलंकेच्या उच्चायुक्तालयामार्फत राजपक्षे यांची बाजू जाणून घेण्याचा प्रयत्न करण्यात आला, पण त्यांच्याशी संपर्क होऊ शकला नाही. पण नागरी युद्धादरम्यान आपण कोणत्याही प्रकारे मानवाधिकारांचे उल्लंघन केलेले नाही, असे त्यांनी याआधी ठामपणे सांगितले आहे.