Deportation Of Indians From US : ‘डंकी रूट’साठी ३० लाख ते १ कोटी, अमेरिकेनं परत पाठवलेल्या भारतीयांची आर्थिक फसवणूक; २ महिन्यांपूर्वीच झाली अटक!

अमेरिकेने परत पाठवलेल्या भारतीयांनी त्यांचे अनेक धक्कादायक अनुभव देखील सांगितले आहेत. या १०४ पैकी ३० पंजाबमधील आणि ३३ गुजरातमधील होते. पंजाब आणि गुजरातमधील किमान १५ लोकांना मेक्सिको-अमेरिका सीमेवरून ताब्यात घेण्यात आले होते. कारण ते अमेरिकेत प्रवेश करण्याचा प्रयत्न करत होते. आता आणखी एक महत्वाची माहिती समोर आली आहे. गेल्या २ महिन्यांतच बेकायदेशीररित्या अमेरिकेत प्रवेश करत असताना यातील बहुतांश लोकांना ताब्यात घेण्यात आलं होतं. यासंदर्भातील वृत्त इंडियन एक्स्प्रेसने दिलं आहे.

दरम्यान, निर्वासितांच्या म्हणण्यांनुसार, त्यातील काहींनी अमेरिकेला पोहोचण्यासाठी लाखो रुपयांचा खर्च केला होता. तसेच काहींनी एजंटच्या माध्यमातून अमेरिकेत बेकायदेशीररित्या प्रवेश केला होता. यातील काहींनी ३० लाख ते १ कोटी रुपये काहींनी खर्च केले होते अशी माहिती आता समोर आली आहे. यामध्ये अमेरिकेत पोहोचण्यासाठी अनेकदा धोकादायक मार्ग, वेगवेगळ्या देशांमधून प्रवास आणि वाहतुकीच्या विविध पद्धतींचा वापर करण्यात आला होता. यातील मोहालीच्या जुरैत गावातील २१ वर्षीय प्रदीप सिंग सहा महिन्यांपूर्वी घर सोडून मेक्सिको-अमेरिका सीमेवर पोहोचला होता. यासाठी त्याने तब्बल ४२ लाख रुपये खर्च केले होते. मात्र, त्याला दोन आठवड्यांपूर्वी ताब्यात घेण्यात आले.

तसेच फतेहगढ साहिबमधील कहानपूर गावातील जसविंदर सिंग (३०) हे अमेरिकेला जाण्यासाठी गेल्या वर्षी ऑक्टोबरमध्ये निघाले होते. यामध्ये त्यांनी ५० लाख रुपये खर्च करून १५ जानेवारी रोजी ते अमेरिकेच्या सीमेवर पोहोचले. तसेच पतियाळातील अहरु खुर्द गावातील अमृत सिंग हा आठ महिन्यांपूर्वी भारतातून निघाला आणि जानेवारीच्या मध्यात अमेरिकेच्या सीमेवर पोहोचला. या दोघांनाही सीमेवरवरून ताब्यात घेण्यात आलं होतं.

दरम्यान, अमेरिकेच्या सीमेवर पकडलेल्यांमध्ये महिलांचाही समावेश आहे. १ जानेवारी रोजी पतीला भेटण्यासाठी आपल्या अल्पवयीन मुलासह पंजाबच्या कपूरथला जिल्ह्यातील भदास गाव सोडलेल्या लवप्रीत कौरने अमेरिकेची सीमा ओलांडण्याचा प्रयत्न करण्यापूर्वी कायदेशीररित्या मेक्सिकोला पोहोचण्यासाठी शेंगेन व्हिसाचा वापर केला होता. मात्र, २७ जानेवारी रोजी अमेरिकन अधिकाऱ्यांनी अटक केली होती. जानेवारीच्या सुरुवातीला प्रवास केलेल्या वडोदरा येथील २९ वर्षीय महिलेलाही हद्दपार करण्यात आले. त्या महिलेच्या आईने प्रतिक्रिया देताना म्हटलं की, “आम्ही अनेक दिवस तिच्या संपर्कात नव्हतो. पण आता ती पुन्हा सुखरूप घरी परतली याचा आम्हाला आनंद आहे.”