पक्षनेतृत्वाने आदेश दिल्यास पदत्याग! धनंजय मुंडे यांची स्पष्टोक्ती

मस्साजोगचे सरपंच संतोष देशमुख यांच्या हत्येप्रकरणावरून मुंडेंच्या मंत्रिपदाच्या राजीनाम्यासाठी दबाव वाढला असताना धनंजय मुंडे दिल्लीत दाखल झाले. दिल्ली विधानसभा निवडणुकीच्या प्रचारासाठी मुख्यमंत्री देवेंद्र फडणवीसही दिल्लीत असतील. या ‘योगायोग’बद्दल, फडणवीस दिल्लीत येणार हे मला इथे आल्यावरच समजले, असे मुंडे म्हणाले. दिल्लीत मुंडे यांनी केंद्रीय अन्न व नागरी पुरवठा मंत्री प्रल्हाद जोशी यांची भेट घेतली.

या प्रकरणाची सीआयडी, विशेष चौकशी पथक व न्यायालयीन चौकशीही होत असून हत्येच्या प्रकरणामध्ये सहभाग असल्याचे पुरावे असल्याशिवाय कोणाचा राजीनामा घेतला जाणार नाही, असे उपमुख्यमंत्री अजित पवार यांनी मंगळवारी स्पष्ट केले होते.

या प्रकरणामध्ये ५१ दिवस माझ्याविरोधात ‘ट्रायल’ घेतली जात आहे. मी माझ्या लोकांशी प्रामाणिक आहे. मी नैतिक आहे आणि देशमुख हत्येप्रकरणात मी दोषी नाही आणि हे माझे मत मला माझ्या वरिष्ठांना सांगावे लागेल.– धनंजय मुंडे, मंत्री, अन्न व नागरी पुरवठा