Donald Trump Attack : अमेरिकी पोलिसांचा हलगर्जीपणा: बंदूकधारी असल्याचे सांगूनही दुर्लक्ष; प्रत्यक्षदर्शीचा आरोप

ज्या इमारतीच्या छतावर शूटर होता तिथल्या एका प्रत्यक्षदर्शीने पोलिसांना शूटरबद्दलची माहिती दिली होती. पोलिसांना सांगूनही त्यांनी ट्रम्प यांना व्यासपीठावरून खाली उतरवलं नाही, असा दावा प्रत्यक्षदर्शीने केला आहे.

प्रत्यक्षदर्शी व्यक्ती काय म्हणाली?

प्रत्यक्षदर्शीने बीबीसीला सांगितलं की “प्रचारसभेच्या ठिकाणाच्या बाजूला असलेल्या इमारतीच्या छतावर आम्ही एका रायफलधारी व्यक्तीला पाहिलं. ती व्यक्ती रांगत पुढे सरकत होती. तो इसम बराच वेळ छतावर होता. त्यानंतर आम्ही याबाबत पोलिसांना कळवलं. मात्र पोलिसांना माहिती दिल्यानंतर बराच वेळ ट्रम्प यांचं भाषण चालू होतं. त्यावेळी आम्हाला प्रश्न पडला की पोलिसांनी ट्रम्प यांना अजून व्यासपीठावरून खाली का उतरवलं नाही? तसेच पोलिसांनी अद्याप त्या रायफलधारी माणसाला का पकडलं नाही? तेवढ्यात आम्ही गोळीबाराचा आवाज ऐकला आणि ट्रम्प जमिनीवर कोसळले.”

प्रत्यक्षदर्शी व्यक्ती म्हणाली, “मी पोलिसांना माहिती दिल्यानंतर सिक्रेट सर्व्हिसचे जवान छताकडे पाहत होते. तेव्हा मी त्यांना हाताने इशारा करून त्या छताकडे पाहण्याचा (जिथे रायफलधारी इसम बसला होता) इशारा करत होतो. मात्र सिक्रेट सर्व्हिसच्या जवानांनी कारवाई करायच्या आधीच ट्रम्प जमिनीवर कोसळले होते. सभेच्या आसपास ज्या इमारती आहेत, सभेपूर्वी त्या इमारतींच्या छतांवर टेहळणी का केली गेली नाही? सपूर्ण परिसरात तपास केला होता का? असे प्रश्न निर्माण झाले आहेत.”

दरम्यान, एका स्थानिकाने सांगितलं की हल्लेखोर मैदानाच्या बाजूला असलेल्या इमारतीवर होता, तो तिथे कसा पोहोचला हे शोधून काढावं लागेल. फेडरल ब्युरो ऑफ इन्वेस्टिगेशन या प्रकरणाचा अधिक तपास करत आहे.

हे ही वाचा >> Donald Trump यांच्यावरील हल्ल्यानंतर पंतप्रधान मोदींचा संताप; म्हणाले, “माझ्या मित्रावर…”,

या हल्ल्यानंतर डोनाल्ड ट्रम्प सुरक्षित असून त्यांनी सिक्रेट सर्व्हिसचे आभार मानले आहेत. सिक्रेट सर्व्हिसच्या जवानांनी हल्ल्यानंतर तत्काळ पावलं उचलत ट्रम्प यांना सुरक्षित केल्याने पुढील अनर्थ टळला.