“हा खेळ चालणार नाही”, डोनाल्ड ट्रम्प यांचा भारतासह ब्रिक्स राष्ट्रांना इशारा; म्हणाले, “डॉलरला बाजूला करून…”

डोनाल्ड ट्रम्प यांनी समाजमाध्यमांवर यासंबंधीची एक पोस्ट लिहिली आहे. यामध्ये त्यांनी म्हटलं आहे की “ब्रिक्स देश अमेरिकन डॉलरच्या वर्चस्वाला आव्हान देऊ पाहतायत आणि गेल्या काही महिन्यांपासून आम्ही केवळ बघ्याच्या भूमिकेत आहोत. मात्र, आता तसं चालणार नाही. अमेरिकेच्या वर्चस्वाला आव्हान देण्यासाठी ब्रिक्सने नवीन चलन तयार करू नये. तसेच ब्रिक्सच्या प्रभावाखाली असलेल्या राष्ट्रांना माझं सांगणं आहे की त्यांनी या ब्रिक्स चलनाचं समर्थन करू नये. ही अट मान्य न करणाऱ्या ब्रिक्स देशांवर १०० टक्के कर लागू केला जाईल. जे देश ही गोष्ट मान्य करणार नाहीत त्यांच्यासाठी अमेरिकन मार्केटचे (बाजार) दरवाजे बंद होतील. त्यांनी नवं मार्केट शोधावं. मार्केटसाठी तुमच्यासारखेच इतर देश शोधा. ब्रिक्स देश आंतरराष्ट्रीय बाजारात अमेरिकन डॉलरऐवजी इतर कोणत्याही चलानाला प्राधान्य देतील असं मला वाटत नाही”.

ट्रम्प यांची ब्रिक्स देशांना थेट धमकी

डोनाल्ड ट्रम्प यांनी यापूर्वी देखील ब्रिक्स देशांना इशारा दिला होता. ते म्हणाले होते ब्रिक्स देशांनी अमेरिकेविरोधात धोरणं आणली तर त्यांना त्याचे परिणाम भोगावे लागतील. या देशांनी अमेरिकेच्या हिताविरोधात काही गोष्टी करण्याचा प्रयत्न केला आहे. यापुढेही हे देश असेच वागत राहिले तर त्यांच्याबरोबर जे काय घडतंय पाहा. ते देश आनंदी राहू शकणार नाहीत, अश इशारा ट्रम्प यांनी दिला. अमेरिकेच्या अध्यक्षपदाची शपथ घेतल्यानंतर ट्रम्प सर्वात आधी त्यांच्या ओव्हल कार्यालयात दाखल झाले. तिथे त्यांनी अनेक कार्यकारी आदेशांवर स्वाक्षरी केली. यावेळी त्यांनी ब्रिक्स देशांना धमकावलं. ते म्हणाले, “ब्रिक्स देशांनी अमेरिकेविरोधात धोरणं आणण्याचा नुसता प्रयत्न केला तरी त्यांना त्याचे परिणाम भोगावे लागतील”.