पाचव्या टप्प्यात आज मतदान, अमेठी रायबरेलीकडे लक्ष

लोकसभेच्या आतापर्यंत चार टप्प्यांमध्ये ३७४ मतदारसंघांत मतदान पार पडले. या चार टप्प्यांत भाजपचे १६६ खासदार होते. उर्वरित तीन टप्प्यांमध्ये १६९ मतदारसंघांमध्ये होणाऱ्या निवडणुकीत भाजपचे ११६ खासदार आहेत. यामुळेच अखेरचे तीन टप्पे हे भाजपसाठी निर्णायक आहेत. रायबरेली मतदारसंघात सोनिया गांधींविरोधात भाजपचे दिनेश प्रताप सिंह रिंगणात आहेत. सिंह हे पूर्वी काँग्रेसमध्ये होते. अमेठीत राहुल गांधी आणि केंद्रीय मंत्री स्मृती इराणी यांच्यात लढत होईल.

राजस्थानमध्ये मतदान होणाऱ्या १२ पैकी ११ मतदारसंघांमध्ये भाजप, तर एका मतदारसंघात काँग्रेसचा खासदार आहे. उत्तर प्रदेशात समाजवादी पक्ष-बसप आघाडीमुळे भाजपपुढे आव्हान आहे. राजस्थान आणि मध्य प्रदेशात सहा महिन्यांपूर्वी झालेल्या विधानसभा निवडणुकांमध्ये भाजपचा पराभव झाला होता. त्यामुळे काँग्रेसला आशा आहे. जम्मू आणि काश्मीरमध्ये अनंतनागबरोबरच लडाखमध्ये मतदान होत आहे. पश्चिम बंगालमध्ये सत्तारूढ तृणमूल काँग्रेसची कसोटी लागणार आहे.

एकूण जागा ५१

• उत्तर प्रदेश १४
• राजस्थान १२
• मध्य प्रदेश, पश्चिम बंगाल प्रत्येकी ७
• बिहार ५
• झारखंड ४
• जम्मू आणि काश्मीर २