‘आप’ला निवडणूक आयोगाची नोटीस

दिल्लीत भाजप कार्यालयासमोर केलेली निदर्शने व त्यानंतर झालेल्या हाणामाऱ्या आम आदमी पक्षाला महागात पडल्या आहेत. निवडणूक आयोगाने याची गंभीर दखल घेत आचारसंहिता भंगाचा बडगा दाखवत आम आदमी पक्षाला नोटीस पाठवली आहे. आज, शुक्रवारी दुपापर्यंत नोटिशीला उत्तर देण्याचे आदेश ‘आप’ला देण्यात आले आहेत.
‘आप’चे निमंत्रक अरविंद केजरीवाल यांना गुजरातमध्ये पोलिसांनी ताब्यात घेतल्याच्या निषेधार्थ बुधवारी आपचे नेते आशुतोष व शाजिया इल्मी यांच्यासह ५० कार्यकर्त्यांनी भाजपच्या येथील कार्यालयासमोर निदर्शने केली. यावेळी आप व भाजपच्या कार्यकर्त्यांत हाणामारीही झाली. जमावाला पांगवण्यासाठी पोलिसांना बळाचा वापर करावा लागला. भाजपने यासंदर्भात बुधवारीच तातडीने केंद्रीय निवडणूक आयोगाची भेट घेऊन आपविरोधात तक्रार दाखल केली. त्याची गंभीर दखल घेत जिल्हा निवडणूक अधिकारी अमेय अभ्यंकर यांनी गुरुवारी आपला नोटीस बजावली.