१७० कोटी रुपयांच्या बँक ठेवी गोठवल्या, कथित बनावट विदेशी मुद्रा व्यापार प्रकरणात ईडीची कारवाई

हिमाचल प्रदेश पोलिसांनी ‘क्यूएफएक्स’ कंपनीविरुद्ध दाखल केलेल्या अनेक ‘एफआयआर’मधून आर्थिक गैरव्यवहार प्रकरणाचा तपास सुरू झाला. यामध्ये बनावट ‘फॉरेक्स ट्रेडिंग’ योजनेद्वारे अनेक गुंतवणूकदारांची फसवणूक केल्याचा आरोप आहे. ‘क्यूएफएक्स’ कंपनी आणि तिचे संचालक एक अनियमित ठेव योजना चालवत आहेत, ज्यामध्ये गुंतवणूकदारांना गुंतवणुकीवर उच्च परतावा देण्याचे वचन देण्यात आले होते, असा आरोप ईडीने केला आहे.

ईडीच्या म्हणण्यानुसार ‘क्यूएफएक्स’ समूह कंपन्यांच्या दलालांनी ‘क्यूएफएक्स’च्या नावाने ‘मल्टी लेव्हल मार्केटिंग’ (एमएलएम) योजना आणून आणि विदेशी मुद्रा व्यापाराच्या नावावर उच्च दराने परतावा देण्याचे आमिष दाखवून गुंतवणूकदारांना आकर्षित करण्यासाठी संकेतस्थळ, अॅप्स आणि सोशल मीडिया जाहिराती तयार केल्या.

पोलिसांकडे ‘एफआयआर’ दाखल केल्यानंतर ईडीला आढळले की, ‘क्यूएफएक्स’ योजनेचे नाव बदलून ‘वायएफएक्स’ (यॉर्कर एफएक्स) करण्यात आले आणि त्याच पद्धतीनुसार उच्च परताव्याच्या आमिषाने निष्पाप गुंतवणूकदारांची फसवणूक केली. यानंतर ‘क्यूएफएक्स’द्वारे अनेक योजना चालवण्यात येऊ लागल्या आणि त्यांचे नियंत्रण लविश चौधरी करत होता. अधिकाधिक ग्राहक गोळा करण्यासाठी भारतासह दुबईतही काही कार्यक्रम आयोजित करण्यात आल्याचे ईडीला आढळले.