Uttar Pradesh Farmer : फुलकोबी १ रुपये किलोने विकली, हताश शेतकऱ्याने उभ्या पिकावर ट्रॅक्टर फिरवला

अमरोहा येथील शेतकरी सामान्यत: स्थानिक बाजारपेठेत त्यांचा माल विकतात. त्यानंतर तो माल दिल्ली-एनसीआर आणि उत्तराखंडमधील मोठ्या मंडईमध्ये जातो. आता या हंगामात ५ हजार हेक्टर क्षेत्रावर फुलकोबी पिकाची पेरणी झालेली आहे. बाजारात मागणीपेक्षा जास्त फुलकोबी आल्यामुळे त्याचे दर पडल्याने शेतकऱ्यांना मोठा आर्थीक तोट्याला समोरं जावं लागलं आहे. या संदर्भातील वृत्त टाइम्स ऑफ इंडियाने दिलं आहे.

अमरोहमधील शेतकरी लालसिंग सैनी यांनी या संदर्भात बोलताना म्हटलं की, “फुलकोबी आणि कोबी पिकवण्यासाठी प्रति बिघा ८,००० ते १०,००० रुपयांपेक्षा जास्त खर्च येतो. तसेच घाऊक भाव सुरुवातीला स्थिर होते. डिसेंबर-जानेवारीत घाऊक बाजारात ३०-४० रुपये दर होते. दिल्लीत फुलकोबी ३०० रुपये प्रतिक्विंटल दराने विकली जात आहे. मात्र, आम्हाला आमचे पीक राजधानीत नेण्यासाठी वाहतुकीला मोठा खर्च येतो. त्यामुळे ते देखील आम्हाला परवडत नाही. याचा अमरोहातील कल्याणपुरा गावाला सर्वाधिक फटका बसला. फुलकोबी आमच्यासाठी अत्यंत तोट्याची ठरली आहे”, असं ते म्हणाले.

अमरोहा येथील एका शेतकरी जगतवीर सैनी यांनी म्हटलं की, “पीक उत्पादनाचा खर्च प्रति बिघा १०,००० रुपयांवर पोहोचला आहे. त्यात शेतात नांगरणी, रोपे लावणे, खते, सिंचन आणि कीटकनाशकांचा वापर यांचा समावेश आहे. पीक आता विकण्यासाठी आलं आहे. मात्र, आम्ही उत्पादन खर्च देखील वसूल करू शकलो नाही.” दरम्यान, याबाबत अमरोहा जिल्हा फलोत्पादन अधिकारी संतोष कुमार यांनी म्हटलं की, “गेल्या वर्षी याच पिकाला शेतकऱ्यांना चांगला भाव मिळाला होता. त्यामुळेच या वर्षीही अमरोहामध्ये हे पीक मोठ्या प्रमाणावर घेण्यात आले. मात्र, बाजारभाव घसरल्यामुळे शेतकऱ्यांना नुकसानीला सामोरं जावं लागत आहे.”