चित्रपटसृष्टीतील लोक पैशांसाठी नग्नही होऊ शकतात, ‘पद्मावती’वरून साक्षी महाराजांचे वक्तव्य

वादग्रस्त वक्तव्यासाठी नेहमी चर्चेत असणार भाजपचे खासदार साक्षी महाराज यांनी आता पद्मावती या संजय लीला भन्साळी यांच्या चित्रपटावरून सुरू असलेल्या वादात उडी घेतली आहे. इतिहासाची मोडतोड सहन केली जाणार नसल्याचा इशारा त्यांनी दिला आहे. पद्मावती, महाराणी, हिंदू आणि शेतकऱ्यांची मस्करी केली जात आहे. हे चुकीचं होत आहे, हे सरकार आणि प्रशासनाला समजलं पाहिजे.  पद्मावती चि़त्रपटावर बंदी घातली पाहिजे, असे ते म्हणाले. चित्रपट क्षेत्रातून याबाबत टीका केली जात आहे, असे त्यांना सांगितले असता ते म्हणाले की, चित्रपट सृष्टीला कुठली अस्मिता किंवा राष्ट्रवादाशी काही देणे घेणे नाही. त्यांना फक्त पैसा हवा आहे. यासाठी ते नग्न नाचण्यासही तयार होतील, असे ते म्हणाले. दि. १ डिसेंबर रोजी पद्मावती चित्रपट प्रसिद्ध होणार आहे.