मनोरुग्णालयातील आगीत २३ जणांचा करूण अंत

दक्षिण रशियातील एका मनोरुग्णालयास आग लागून २३ जण ठार झाले आहेत, असे देशाच्या आपत्कालीन सुविधा मंत्रालयाने सांगितले.
रुग्णालयाची इमारत लाकडाची होती व ती आगीत भस्मसात झाली. यात एकूण २० जणांना रुग्णालयात दाखल करण्यात आले होते. शनिवारी मध्यरात्रीनंतर अलफेरोवका खेडय़ातील या रुग्णालयात आग लागली.
हे ठिकाण दक्षिण रशियातील वोरोनेझ भागात आहे. किमान ४४० अग्निशमन जवानांनी ८० वाहनांसह घटनास्थळी जाऊन आग विझवली. आगीचे कारण लगेच समजू शकले नाही. सोविएत काळातील मनोरोग उपचार केंद्रात लागलेली ही आग वेगाने पसरत गेली.
या भागात घरांनाही नेहमी आगी लागत असतात. त्यामुळे येथील अग्निशमन दलाने नागरिकांना सतर्कतेचे आदेश दिले आहेत.