Pahalgam Terror Attack: जम्मू-काश्मीरमधील दहशतवादी हल्ल्यानंतर केंद्रीय गृहमंत्री तातडीने श्रीनगरला रवाना

पोलीस अधिकाऱ्यांच्या माहितीनुसार, बैसरन पर्वतावर फक्त पायी किंवा घोड्यावरून जाता येते. निसर्गसौंदर्यामुळे या भागाला मिनी स्वित्झर्लंड म्हटले जाते. वाहन थेट पोहोचत नसल्यामुळे सुरूवातीला बचाव कार्यात अडथळे आल्याचे सांगितले जाते.

प्रत्यक्षदर्शींचे अनेक व्हिडीओ आता सोशल मीडियावर व्हायरल होत आहेत. हल्ला इतका भीषण होता की, त्यात किमान २० लोकांचा मृत्यू झाल्याची भीती वर्तविण्यात येत आहे. तसेच अनेक लोक गंभीर जखमी झाले आहेत.

भाजपाचे नेते रवींद्र रैना यांनी या घटनेवर प्रतिक्रिया देत असताना पाकिस्तानी दहशतवाद्यांचा हल्ल्यामागे हात असण्याची शक्यता वर्तविली. या संपूर्ण परिसराला वेढा घातला जावा आणि दहशतवादी, तसेच त्यांना मदत करणाऱ्यांना शिक्षा दिली जावी, अशी मागणी त्यांनी केली आहे.

जम्मू आणि काश्मीरच्या माजी मुख्यमंत्री आणि पीपल्स डेमोक्रॅटिक पक्षाच्या प्रमुख मेहबुबा मुफ्ती यांनी या हल्ल्याचा जाहीर निषेध व्यक्त केला. या घटनेत ज्यांना दुखापत झाली, त्या कुटुंबियांच्या मागे आम्ही ठामपणे उभे आहोत. या हल्ल्यामागे फक्त येथील शांतता भंग करून विनाकारण दहशत निर्माण करण्याचा प्रयत्न दिसतो. अशा हल्ल्याचे कधीही समर्थन करता येणार नाही.