रशिया आणि युक्रेन यांच्यादरम्यान सुरू असलेल्या युद्धात आतापर्यंत दोन भारतीय विद्यार्थ्यांना जीव गमावावा लागला आहे. तर, आणखी एक विद्यार्थी युक्रेनची राजधानी किव्हमध्ये गोळीबारात जखमी झाला होता.(युद्धाच्या लाईव्ह अपडेट्स वाचण्यासाठी इथे क्लिक करा). केंद्रीय मंत्री व्हीके सिंग यांनी यासंदर्भात माहिती देत हा विद्यार्थी किव्हमधून पळून जाण्याचा प्रयत्न करत असताना त्याच्यावर गोळी झाडली गेली, असं सांगितलं होतं. यानंतर त्याच्यावर रुग्णालयात उपचार सुरू असल्याचंही ते म्हणाले होते. दरम्यान, आता जखमी विद्यार्थ्यानाचे त्याची आपबीती सांगितली आहे.
किव्हमध्ये जखमी झालेल्या विद्यार्थ्याचं नाव हरजोत सिंग आहे. तो मूळचा छत्तरपूरचा आहे. त्याने एनडीटीव्हीशी बोलताना सांगितलं की, “त्याच्या पायाला खूप वेळ मार लागल्यानं त्याचा पाय फ्रॅक्चर झाला आहे. गोळी माझ्या खांद्यावरून घुसली. डॉक्टरांनी माझ्या छातीतून एक गोळी काढली आहे,” असं हरजोत सिंग किव्ह सिटी हॉस्पिटलमधून बोलताना म्हणाला.
“मी दूतावासातील लोकांशी संपर्क साधला आणि विचारले की ते मला ल्विव्हला नेण्यासाठी सुविधा देऊ शकतात का. मला चालता येत नव्हतं. पण मला फक्त खोटी आश्वासनं मिळाली. मी अधिकार्‍यांना फोन करत राहिलो. पण कोणीही माझ्याशी संपर्क साधला नाही,” असा आरोप त्याने केलाय.
माझ्यासारखे असंख्य हरजोत किव्हमध्ये अडकून असल्याचं तो म्हणाला. “बर्‍याच जणांनी स्वतःला घरात कोंडून घेतले आहे, त्यांना काय होत आहे ते कळत नाही. मी सतत दूतावासाशी बोलण्याचा प्रयत्न करत होतो. पण विद्यार्थ्यांना बाहेर काढण्यापूर्वीच दूतावासातील अधिकारी ल्विव्हला निघून गेलेत. त्यांनी विद्यार्थ्यांना मदत केली नाही,” असा आरोप हरजोतने केलाय.
“माझा एकच मेसेज आहे की जे काही घडलंय, त्याबद्दल आम्ही काहीही करू शकत नाही. आम्ही फक्त चांगल्याची आशा करू शकतो. युक्रेनमधील वास्तव काय आहे, हे लोकांना समजलं पाहिजे,” असं तो म्हणाला. ‘माझी आई घरी सतत रडत आहे,’ असं त्याने सांगितलं.
