भारताची राजधानी दिल्लीत येत्या शनिवारी व रविवारी (९-१० सप्टेंबर) जी-२० शिखर परिषदेचं आयोजन केलं आहे. या परिषदेला जगभरातील अनेक प्रमुख नेते उपस्थित राहणार आहेत. अगदी अमेरिकेचे राष्ट्राध्यक्ष जो बायडेनही उपस्थित राहणार आहेत. जी-२० परिषदेच्या निमित्ताने पाहुण्यांच्या स्वागतासाठी भारताकडून जोरदार तयारी केली जात आहे. ही तयारी आता अंतिम टप्प्यात आली आहे. जगभरातील प्रमुख नेत्यांच्या पाहुणचारात कोणत्याही प्रकारची कमतरता भासली नाही पाहिजे, यासाठी सरकारकडून विशेष प्रयत्न केले जात आहे.
जी-२० शिखर परिषदेसाठी येणाऱ्या प्रतिनिधींना चांदी आणि सोन्याच्या भांड्यात जेवण वाढलं जाणार आहे. खास कारागिरांकडून भारतीय संस्कृतीप्रमाणे ही भांडी तयार करून घेतली आहे. जी-२० परिषदेतील प्रतिनिधींसाठी ८ ते १० सप्टेंबर या कालावधीत दुपार आणि रात्रीच्या जेवणाचं नियोजन करण्यात आलं आहे. या प्रतिनिधींना सोन्या-चांदीच्या ताटात जेवण वाढलं जाणार आहे.
ही भांडी नेमकी कशी असतील? याचा एक व्हिडीओ समोर आला आहे. हा व्हिडीओ सोशल मीडियावर व्हायरल झाला आहे. यामध्ये सोन्या-चांदीच्या धातूने मढवलेली आलिशान भांडी दिसत आहेत. ‘एएनआय’ वृत्तसंस्थेनं हा व्हिडीओ शेअर केला आहे.
राजधानी दिल्लीत पार पडणाऱ्या जी-२० शिखर परिषदेला अमेरिकेचे राष्ट्राध्यक्ष जो बायडेन, फ्रान्सचे राष्ट्राध्यक्ष इमॅन्युएल मॅक्रॉन, ऑस्ट्रेलियाचे पंतप्रधान अँथनी अल्बानीज, जर्मनीचे चान्सलर ओलाफ स्कोल्झ, ब्रिटनचे पंतप्रधान ऋषी सुनक, जपानचे पंतप्रधान फुमियो किशिदा आणि ब्राझीलचे राष्ट्राध्यक्ष लुईझ इनासिओ लुला-द-सिल्वा आदि नेते उपस्थित राहणार आहेत. तथापि, रशियाचे राष्ट्राध्यक्ष व्लादिमीर पुतीन आणि चीनचे राष्ट्राध्यक्ष शी जिनपिंग हे या परिषदेला गैरहजर राहण्याची शक्यता आहे. मात्र, याबाबतची लेखी पुष्टी अद्याप झाली नाही.
