चौहान यांना मौन पाळण्याचे आदेश!

फिल्म अ‍ॅण्ड टेलिव्हिजन इन्स्टिटय़ूटच्या नियामक मंडळाचे अध्यक्ष गजेंद्र चौहान पहिल्यांदाच संस्थेत दाखल झाल्याच्या निषेधार्थ विद्यार्थ्यांनी केलेल्या निदर्शनांमुळे केंद्रीय माहिती व प्रसारण मंत्रालयात पुन्हा या विषयावर चर्चा सुरू झाली आहे. राज्यमंत्री राज्यवर्धन राठोड यांनी मंत्रालयातील सर्वच अधिकाऱ्यांना याप्रकरणी प्रसारमाध्यमांशी न बोलण्याचा आदेश दिला, तर गजेंद्र चौहान यांना प्रतिक्रिया व्यक्त न करण्याची सूचना केली. गेल्या अनेक महिन्यांपासून चौहान यांच्या नियुक्तीवरून विद्यार्थी व प्रशासनात संघर्ष सुरू आहे.