लज्जास्पद… गणपतीच्या गळ्यातील हार चोराकडून लंपास

इंदौरमधील जयरामपूर कॉलनीच्या गणेश मंडपामध्ये एका भुरट्या चोराने डल्ला मारला आहे. गणपतीच्या गळ्यात असलेला ५१ हजार रूपये किंमतीचा नोटांचा हार चोरट्याने चोरला आहे. लालबागच्या राजाची प्रतिकृती येथे उभारण्यात आली आहे.

मिळालेल्या माहितीनुसार, जयरामपूर कॉलनीत सिद्धिविनायक गणेश मित्र मंडळाद्वारे गणेश उत्सवाचे भव्यदिव्य आयोजन करण्यात आले आहे. मोठ्या मंडपामध्ये गणेशाची स्थापना करण्यात आली आहे. एक भुरटा चोरटा मंडपात आला आणि ५१ हजार रूपये किंमतीच्या नोटाचा हार चोरला. चोराची ही घटना मंडपात लावलेल्या सीसीटीव्ही कॅमेऱ्यामध्ये कैद झाली आहे. मंडळाच्या आयोजकांनी सीसीटीव्हीच्या आधारावर चोराची ओळख पटवली आहे. मंडळाने पोलिस स्थानकात तक्रार दिली आहे. पोलिस आरोपीचा शोध घेत आहेत.

दरम्यान, उद्या देशभर ११ दिवसांच्या गणपतीचे विसर्जन करण्यात येणार आहे. घरगुती तसेच मंडळांनी याची पुर्ण तयारी केली आहे. गणपती विसर्जनाला पाऊस हजेरी लावण्याची चिन्हे आहेत.