पंतप्रधान मोदींच्या कार्यकाळात सरकारचे कर्ज ४९ टक्क्यांनी वाढले

केंद्रातील मोदी सरकारने लोकसभा निवडणुकीपूर्वी अनेक लोकानुनयी घोषणा करण्याची तयारी केल्याचे दिसत आहे. मात्र, दुसरीकडे महसुली तोटा ही त्यांची डोकेदुखीही ठरत आहे. एका अहवालानुसार, पंतप्रधान नरेंद्र मोदींच्या साडेचार वर्षांच्या कार्यकाळात भारत सरकारवरील कर्जांत ४९ टक्क्यांची वाढ झाली आहे. शुक्रवारी केंद्र सरकारच्या कर्जाच्या स्थितीवरील आठवी आवृत्ती प्रसिद्ध करण्यात आली आहे. या अहवालानुसार मागील साडेचार वर्षांत सरकारवरील कर्ज ४९ टक्क्यांनी वाढून ८२ लाख कोटी रूपये झाले आहे. अर्थ मंत्रालयाच्या आकडेवारी नजर टाकल्यास जून २०१४ मध्ये सरकारवर एकूण ५४,९०,७६३ कोटी इतके कर्ज होते. जे सप्टेंबर २०१८ मध्ये वाढून ८२,०३,२५३ कोटी रूपये झाला आहे.