पर्यटकांना धोक्याचा इशारा देणारे फलक लावणार
आपणा सर्वाना अपघातप्रवण क्षेत्राचे इशारे देणारे फलक रस्त्यांवर नेहमीच दिसतात; पण यापुढे आता सेल्फी धोकादायक क्षेत्राचे (‘सेल्फी डेंजर झोन’) इशारे देणारे फलक पुलांवर, डोंगरदऱ्यांवर, घाटांवर, किल्ल्यांवर आणि समुद्रकिनाऱ्यांवर दिसले तर आश्चर्य वाटू नये! महाराष्ट्र सरकारने तसे फलक जागोजागी लावण्याची तयारी केली आहे.
सेल्फी काढण्याच्या प्रयत्नात होणाऱ्या वाढत्या अपघाती मृत्यूंचा मुद्दा सोमवारी लोकसभेत चर्चेला आला. प्रल्हादसिंह पटेल आणि सावित्री ठाकूर यांनी याबाबत प्रश्न विचारला होता. सेल्फीच्या नादात जीव जात असल्याने सेल्फी काढण्यासाठी धोकादायक असलेले विभाग (सेल्फी डेंजर झोन) जाहीर करण्याचा केंद्राचा काही इरादा आहे का, असा त्यांचा सवाल होता. त्यावर सांस्कृतिक खात्याचे
राज्यमंत्री (स्वतंत्र प्रभार) डॉ. महेश शर्मा यांनी हा अधिकार राज्यांचा असल्याचे उत्तर दिले. त्याच वेळी महाराष्ट्र आणि कर्नाटक सरकारने सेल्फीमुळे होणाऱ्या अपघातस्थळांच्या संभाव्य ठिकाणी सेल्फी काढण्याबाबतचे इशारे देणारे फलक लावण्याचा निर्णय घेतल्याची माहिती दिली. मुंबईसह मुरुड, लोणावळा, खंडाळा यांसारख्या ठिकाणी सेल्फी काढण्याच्या नादात जीव गमाविल्याच्या घटना गेल्या काही महिन्यांत घडलेल्या आहेत. भोपाळ येथील क्रीडा प्राधिकरणाच्या प्रशिक्षण केंद्रात क्रीडापटू पूजा कुमारी हिचा सेल्फी काढताना तोल जाऊन नुकताच मृत्यू झाला होता.
