दुबईहून लग्नासाठी भारतात आला, इन्स्टाग्रामवरील नवरीनं जबर गंडवला; वरात घेऊन आलेल्या नवऱ्याची अजब फजिती

प्रकरण काय आहे?

दीपक आणि मनप्रीत कौर यांची तीन वर्षांपूर्वी इन्स्टाग्रामवर ओळख झाली. आधी चॅटिंग आणि नतंर कॉलिंगवर दोघांचं प्रेम बहरलं. फोनवरच दोघांनी लग्न ठरवलं. दोघांच्या पालकांनी फोनवरच लग्नाची बोलणी केली. ६ डिसेंबरचा मुहूर्त ठरला. दीपक आणि त्याचे कुटुंबिय दहा-बारा पाहुणे घेऊन लग्न करणार होते. पण मुलीकडच्या लोकांनी सांगितलं, चांगले दीडशे लोक आणा, काही हरकत नाही. शुक्रवारी दीडशे पाहुण्यांची वरात घेऊन दीपक पोहोचला. पण मोगा शहरात नवरीकडच्या लोकांनी सांगितलेले मंगल कार्यालयच अस्तित्त्वात नसल्याचं समोर आलं.

शुक्रवारी दुपारी वरात मोगा येथे पोहोचली. दीपकने मनप्रीतला फोन लावला. तिने सांगितले की, तिचे काही लोक वरातीला घ्यायला लगेच येत आहेत. मात्र पाच तास थांबूनही कुणीही आलं नाही. थोड्या वेळाने दीपक मनप्रीतला वारंवार फोन लावत होता, पण मनप्रीतचा फोन त्यानंतर स्विच ऑफ येत होता. पाच तास वरात ताटकळत राहिल्यानंतर अखेर त्यांनी स्थानिक पोलीस ठाणे गाठून मनप्रीत आणि तिच्या कथित कुटुंबियाविरोधात तक्रार दाखल केली. तक्रारी दरम्यान दीपकने तीन वर्षांपासूनचा सर्व घटनाक्रम सांगितला.

५० हजार रुपयेही घेतले

दीपक म्हणाला की, आम्ही आजवर कधीही समोरासमोर भेटलो नव्हतो. मी तिचा केवळ फोटो पाहिला होता. आता तो तिचाच फोटो होता का? याचीही शंका येते. मनप्रीतनं सांगितलं होतं की, रोझ गार्डन पॅलेसमध्ये लग्न ठेवलं आहे. पण असं काही मंगल कार्यालयच मोगामध्ये नाही. तसेच मनप्रीतने लग्नाच्या खर्चासाठी ५० हजार रुपये मागितले होते. ते तिला ऑनलाईन पाठवून आपली फसवणूक झाल्याचेही दीपकने सांगितले.

मोगा शहर दक्षिण पोलीस ठाण्याचे प्रमुख हरजींदर सिंग यांनी सांगितले की, आम्ही दीपकच्या कुटुंबियांची तक्रार दाखल करून घेतली आहे. ज्या क्रमाकांवरून मनप्रीत कौर संवाद साधत होती, त्याबद्दल आम्ही माहिती मागितली आहे आणि लवकरच आरोपीला ताब्यात घेऊ.