नवरदेवानं लग्नात आलेल्या पाहुण्याची गोळी घालून केली हत्या, धक्कादायक कारण आलं समोर

मिळालेल्या माहितीनुसार, संबंधित घटना उत्तर प्रदेशातील मुझफ्फरनगर जिल्ह्याच्या शाहपूर येथील आहे. घटनेच्या दिवशी मंगळवारी लग्नाची वरात सुरू असताना डीजेवर लावलेल्या गाण्यावरून दोन गटात वाद झाला होता. यावेळी एका गटातील काही जणांनी डीजेवर सुरू असलेल्या गाण्यावर आक्षेप घेतला. दरम्यान संताप अनावर झाल्यानंतर नवरदेवानं थेट वाद घालणाऱ्या पाहुण्यावर गोळीबार केला.

या हल्ल्यात संबंधित पाहुणा गंभीर जखमी झाला. उपस्थित नातेवाईकांनी तातडीनं त्यांना उपचारासाठी स्थानिक रुग्णालयात दाखल केलं. पण तोपर्यंत फार उशीर झाला होता. रुग्णालयात दाखल होताच वैद्यकीय अधिकाऱ्यांनी पाहुण्याला मृत घोषित केलं. मृत पाहुणा हा वधू पक्षाकडून लग्नात आला होता, अशी माहिती सहाय्यक पोलीस निरीक्षक अतुल श्रीवास्तव यांनी दिली.

जफर अली असं मृत पावलेल्या पाहुण्याचं नाव आहे. याप्रकरणी पोलिसांनी नवरदेव इफ्तीखार याला अटक केली आहे. हा धक्कादायक प्रकार घडल्यानंतर गावात मोठा तणाव निर्माण झाला आहे. दक्षता म्हणून पोलिसांनी गावात पोलीस बंदोबस्त वाढवला आहे.