पीटीआय, अहमदाबाद
काँग्रेसने शनिवारी गुजरात विधानसभा निवडणुकीसाठी जाहीरनामा प्रसिद्ध केला. यामध्ये सत्तेत आल्यास अहमदाबादच्या नरेंद्र मोदी स्टेडियमचे नाव पुन्हा बदलून सरदार वल्लभभाई पटेल स्टेडियम करण्याचे आश्वासन देण्यात आले आहे. याखेरीज दहा लाख नोकऱ्या, एलपीजी सिलिंडर घेण्यासाठी ५०० रुपये, महिन्याला ३०० युनिट वीज मोफत तसेच बेरोजगाराला तीन हजार रुपये भत्ता आदी आश्वासनेही काँग्रेसने मतदारांना दिली आहेत.
राजस्थानचे मुख्यमंत्री आणि पक्षाचे गुजरात निवडणुकीसाठीचे वरिष्ठ निरीक्षक अशोक गेहलोत यांनी जाहीरनाम्याचे प्रकाशन केले. ते म्हणाले की, ‘सरदार पटेल यांचे मूळ गाव असलेल्या करामसाद शहरातून काही कार्यकर्ते भेटले. त्यांनी मोटेरामधील स्टेडियमचे नाव बदलण्याची मागणी करणारे निवेदन दिले आहे. त्याला अनुसरून सत्तेत आल्यास पहिल्या मंत्रिमंडळ बैठकीमध्ये मैदानाच्या नामांतराचा निर्णय घेतला जाईल.’ बिल्किस बानो बलात्कार प्रकरणात ११ जणांची शिक्षा रद्द करण्याचे आश्वासनही काँग्रेसने जाहीरनाम्यात दिले आहे. १५ ऑगस्ट रोजी या सर्वाची गोधरा उपकारागृहातून मुक्तता करण्यात आली होती.
घोषणांची खैरात
गुजरातमध्ये दोन दशके सत्तेबाहेर असलेल्या काँग्रेसने सत्तेवर आल्यास तीन लाख रुपयांपर्यंत कृषी कर्जमाफी देण्याचेही घोषित केले आहे. शिशू वर्गापासून पदव्युत्तर मोफत शिक्षण, प्रत्येक पिकाला किमान आधारभूत दर (एमएसपी) निश्चित करण्यासाठी समिती स्थापन करण्याचे आश्वासन काँग्रेसने दिले आहे. १८२ सदस्यीय गुजरात विधानसभेसाठी १ आणि ५ डिसेंबर अशा दोन टप्प्यांत मतदान होणार असून मतमोजणी ८ डिसेंबरला होईल.
सरकारी कर्मचाऱ्यांसाठी..
गुजरातमधील निवडणुकीत सरकारी कर्मचारी आपल्या बाजूला वळविण्यासाठी काँग्रेसने जुनी निवृत्तीवेतन योजना (ओपीएस) लागू करण्याचे आश्वासन दिले आहे. त्याशिवाय सरकारी विभागांतील कंत्राटी भरतीची पद्धत तसेच बाह्यस्त्रोत (आउट सोअर्सिग) बंद करण्याची ग्वाही काँग्रेसने दिली आहे.
