video of long queues outside crematoriums in China spreads Covid fear: चीनमध्ये करोना संसर्गाचा विस्फोट झाला आहे. वाढत्या करोना संसर्गामुळे आरोग्य यंत्रणेवर ताण पडताना दिसत आहे. अनेक शहरांमध्ये रुग्णालयामधील बेड्स पूर्णपणे भरले असून रुग्णांची संख्या दिवसोंदिवस वाढतच आहे. अशातच आता चीनमधील करोना संसर्गाची दाहकता दर्शवणारा एक व्हिडीओ समोर आला आहे. या व्हिडीओमध्ये अनेकजण आपल्या नातेवाईकाचा मृतदेह घेऊन दफनभूमीबाहेर रांगेत उभे असल्याचं दिसत आहे.
आरोग्यविषय तज्ज्ञ एरिक फिजल-डिंग यांनी ट्विटरवरुन हा व्हिडीओ शेअर केला आहे. आपल्या प्रियजनांचे मृतदेह घेऊन दफनभूमीच्याबाहेर अनेक तास आपल्या क्रमांक येण्याची वाट पाहत असलेले नागरिक या व्हिडीओमध्ये दिसत असल्याचा दावा डॉ. डिंग यांनी केला आहे.
“दफनभूमीबाहेरील लांब रांगा. तुमच्या जवळच्या व्यक्तींच्या अंत्यसंस्कारासाठी अनेक तास रांगेत उभं राहुून वाट पाहण्याबरोबरच त्या मृत व्यक्तीच्या मृतदेहाबरोबर रांगेत उभं राहणं हा विचारही भयानक वाटतो,” असं डॉ. डिंग यांनी कॅप्शनमध्य म्हटलं आहे. चीनमध्ये सध्या थैमान घालणाऱ्या करोना लाटेच्या चकाट्यात सापडलेल्यांबद्दल थोडी सहानुभूती दाखवूयात, असंही डॉ,. डिंग म्हणालेत.
एक डिसेंबरपासून चीनमध्ये करोनाची नवीन लाट आली असून अनेक मृत्यू जगातील सर्वाधिक लोकसंख्या असलेल्या या देशात झाल्याची शक्यता व्यक्त केली जात आहे. मात्र सरकारी आकडेवारी वेगळेच आकडे सांगत असल्याने माहिती लपवली जात असल्याची शंकाही घेतली जात आहे.