मुसळधार पावसामुळे दिल्ली-एनसीआरमधील रस्ते जलमय; नोएडातील शाळा आज बंद, गुडगावमधील कर्मचाऱ्यांना ‘वर्क फ्रॉम होम’

उत्तर प्रदेशातील काही भागांमध्ये गुरुवारी मुसळधार पाऊस कोसळला आहे. यामुळे काही ठिकाणी जीवितहानी झाल्याचे वृत्त आहे. दमदार पावसामुळे एनसीआरमधील काही मालमत्तांचे नुकसान झाले आहे. रस्ते जलमय झाल्यामुळे वाहतूक पोलिसांना वाहतूक कोंडी सोडवण्यासाठी कसरत करावी लागत आहे. काही भागात झाडे उन्मळून पडल्याच्या घटनादेखील घडल्या आहेत.

मान्सुन माघारी परतत असताना झालेल्या पावसामुळे दिल्ली-एनसीआरमधील ४६ टक्क्यांची पाण्याची तूट भरुन निघाली आहे. यामुळे दिल्लीकरांना स्वच्छ हवा अनुभवायला मिळत असून तापमान नियंत्रित राहण्यास मदत होत आहे. नवी दिल्लीत आज किमान तापमान २३.८ डिग्री सेल्सिअस तर कमाल तापमान २८ डिग्री सेल्सिअस नोंदवले गेले आहे.