सध्या संपूर्ण देशभरात श्रद्धा वालकर हत्याकांडामुळे खळबळ माजलेली असताना शेजारील देश बांगलादेशमध्येही अशीच घटना घडली आहे. अबु बकर याने आपली हिंदू प्रेयसी कविता राणी हिचा खून करुन मृतदेहाचे तुकडे केले आहेत. पोलिसांना घऱात एका बॉक्समध्ये मृतदेहाचं मुंडकं आणि शरीर सापडलं आहे. पोलिसांनी आरोपीला अटक केली आहे.
६ नोव्हेंबरला अबू बकर कामावर आला नव्हता. त्याचा फोन ही लागत नसल्याने कंपनीच्या मालकाने एका कर्मचाऱ्याला त्याच्या भाड्याच्या घरी पाठवलं. पण घराला आतून कडी लावण्यात आली होती. अबू बकर बरेच दिवस घरी न आल्याने घरमालकाला संशय आला आणि त्याने पोलिसांना माहिती दिली.
पोलिसांना घऱात जाऊन पाहिलं असता एका बॉक्समध्ये मुंडकं नसलेला महिलेचा मृतदेह आढळला. एका पिशवीत मुंडकं ठेवण्यात आलं होतं. मृतदेहाचे हात तिथे नव्हते. मृतदेहाची ओळख पटली असून कविता राणी असं पीडित तरुणीचं नाव आहे.
७ नोव्हेंबरला पोलिसांनी अबु बकरला त्याची लिव्ह-इन पार्टनर सपनासहित अटक केली. बांगलादेशच्या रॅपिड अॅक्शन फोर्सच्या अधिकाऱ्याने दिलेल्या माहितीनुसार, अबू आणि सपना गेल्या चार वर्षांपासून एकत्र राहत होते. पाच दिवसांपूर्वीच त्याची कविताशी भेट झाली होती. यानंतर दोघे एकमेकांच्या जवळ आले होते. यादरम्यान त्याने तिची हत्या करुन मृतदेहाचे तुकडे केले.
५ नोव्हेंबरला सपना घरात नसताना अबूने कविताला आपल्या भाड्याच्या घरात बोलावलं होतं. यावेळी दोघांमध्ये वाद झाला. याच वादात अबूने कविताची गळा दाबून हत्या केली. यानंतर त्याने तिचं मुंडकं आणि हात कापले. कापलेले हात त्याने नाल्यात फेकून दिले. मुंडकं एका पिवशीत गुंडाळून ठेवलं आणि मृतदेह एका बॉक्समध्ये भरुन पळून गेला.
त्याच रात्री अबूने सपनासह रुपसा नदी ओलांडली आणि ढाकाच्या दिशेने गेला. दुसरीकडे त्याच्या घऱात कविताचा मृतदेह सापडल्यानंतर पोलिसांनी लगेच सर्च ऑपरेशन सुरु केलं होतं. रॅपिड अॅक्शन फोर्स आणि पोलिसांनी दोघांचं ठिकाण शोधलं. यानंतर दोघांनाही अटक करत स्थानिक पोलिसांकडे सोपवण्यात आलं.
चौकशीदरम्यान अबू बकरने आपला गुन्हा कबूल केला. पोलिसांना मृतदेहाचे हातही सापडले आहेत. एका पिशवीत गुंडाळून ते टाकून देण्यात आले होते.
