हुबळी धारवाड इदगाह मैदानावर गणेशोत्सव साजरा करण्यावरून वाद सुरू आहे. अशातच धारवाड महानगरपालिकेने गणेश मंडळाला गणपती मूर्तीची प्रतिष्ठापना करण्याची परवानगी दिली आहे. ही परवानगी देताना धारवाड महानगरपालिकेच्या आयुक्तांनी हा निर्णय उच्च न्यायालयाच्या आदेशानुसारच दिल्याचं म्हटलं.
असं असलं तरी जवळपास २० नागरी संघटनांनी इदगाह मैदानावर कोणत्याही उत्सवाला परवानगी देऊ नये, अशी मागणी केली होती. धारवाड महानगरपालिका आयुक्तांनी इदगाह मैदानावर तीन दिवसांच्या गणेशोत्सवासाठी परवानगी दिली आहे.
उच्च न्यायालयात नेमकं काय घडलं?
अजुमन-ए-इस्लामने इदगाह मैदानावर गणेशोत्सव साजरा करण्यासाठी धारवाड महानगरपालिकेने दिलेल्या परवानगीला उच्च न्यायालयात आव्हान दिलं. मात्र, उच्च न्यायालयाने त्यांची ही याचिका फेटाळली. तसेच इदगाह मैदानावर गणेशोत्सवाला परवानगी दिली.
नेमकं प्रकरण काय?
इदगाह मैदानाचा वापर पारंपारिकपणे स्थानिक मुस्लीम रमजान आणि बकरी ईदला नमाजसाठी करत आले आहेत. स्वातंत्र्यपूर्व काळात या मैदानावर राजकीय सभा झाल्याच्याही नोंदी आहेत. १९ व्या शतकात या मैदानाची मालकी मूपना बसप्पा नरूळ, इसार वंच पाद्री आणि बसल मिशनकडे होती. २० व्या शतकात या मैदानाची मालकी हुबळी नगरपालिकेकडे आली. १९२१ मध्ये अंजुमन-ए-इस्लामने या मैदानावर मुस्लिमांना प्रार्थना करण्यासाठी या मैदानाची मागणी केली. नगरपालिकेने ही मागणी मान्य करत इदगाह मैदान ९९९ वर्षांच्या करारावर अंजुमन इस्लामला दिलं.
हेही वाचा : विश्लेषण : कर्नाटकातील हुबळी धारवाड इदगाह मैदानावर गणेशोत्सवाचा नेमका वाद काय? वाचा इतिहास…
१९६० मध्ये सरकारने अंजुमनला या मैदानावर काही अटी आणि शर्ती घालत दुकानं बांधण्यास परवानगी दिली. १९७२ मध्ये अंजुमनने या मैदानावर व्यावसायिक संकुल बांधण्याचा प्रयत्न केला. याविरोधात न्यायालयात याचिका दाखल झाली. अनेक दशकं हे खटले न्यायालयात चालले. २०१० मध्ये सर्वोच्च न्यायालयाने उच्च न्यायालय व इतर कनिष्ठ न्यायालयांच्या निर्णयावर शिक्कामोर्तब केला. यानुसार मैदानाची मालकी नगरपालिकेची आहे. अंजुमनला वर्षातून दोनदा केवळ प्रार्थनेसाठी मैदानाची परवानगी आहे आणि मैदानावर बांधकाम करण्याची परवानगी नाही, असं स्पष्ट करण्यात आलं.
