“TRP रेटिंग्ज पुन्हा सुरू करा”, केंद्र सरकारचे BARC ला आदेश; वृत्तवाहिन्यांना दिलासा!

ऑक्टोबर २०२०मध्ये उघड झालेल्या टीआरपी घोटाळ्यानंतर वृत्तवाहिन्यांसाठीचे टीआरपी रेटिंग्ज थांबवण्याचा निर्णय घेण्यात आला होता. BARC अर्थात Broadcast Audience Research Council ला केंद्र सरकारने तसे आदेश दिले होते. मुंबई पोलिसांनी दावा केला होता की बार्क आणि हस्ना या ग्राहक संशोधन कंपनीकडून दाखल करण्यात आलेल्या तक्रारीवर टीआरपीचं मोठं रॅकेट उद्ध्वस्त करण्यात आलं. यानुसार टीआरपी मापन करण्यासाठी निवडण्यात आलेल्या विशिष्ट घरांमध्ये विशिष्ट वृत्तवाहिनी सुरू ठेवण्यासाठी पैसे देण्यात आल्याचा दावा करण्यात आला होता. या प्रकरणात रिपब्लिक टीव्हीचे संपादक अर्णब गोस्वामी आणि इतर दोन मराठी वाहिन्यांची नावं वादात सापडली होती.

बार्कनं कार्यपद्धतीत केला मोठा बदल!

दरम्यान, आता टीआरपी रेटिंग्जसोबत कोणतीही छेडछाड होणार नाही, असा दावा बार्ककडून करण्यात आला आहे. त्यासाठी टीआरपी कमिटीचा अहवाल आणि शिफारशींच्या आधारावर बार्कनं आपल्या कार्यपद्धतीमध्ये काही बदल केल्याचं सांगितलं आहे. त्यात तटस्थ व्यक्तीचा बोर्ड आणि तांत्रिक समितीमध्ये समावेश करण्याच्या निर्णयाचा देखील समावेश आहे. तसेच, एक कायमस्वरूपी देखरेख समिती देखील स्थापन करण्यात आली आहे. बार्कची माहिती मिळवण्याच्या प्रणालीमध्ये सुरक्षा अधिक कठोर करण्यात आल्याची माहिती बार्कनं केंद्राला दिली आहे.