रस्त्यावर नमाज रोखू शकत नाही, तर जन्माष्टमीवर बंदी घालायचा अधिकार मला नाही- योगी आदित्यनाथ

‘प्रेरणा जनसंचार एवं शोध संस्थान’ या संस्थेतर्फे आयोजित करण्यात आलेल्या या कार्यक्रमाला राष्ट्रीय स्वयंसेवक संघाचे सह सरकार्यवाह दत्तात्रेय होसाबळे हे देखील उपस्थित होते. यावेळी योगी आदित्यनाथ यांनी सरळसरळपणे उत्सव काळात लादण्यात येणाऱ्या आवाजी निर्बंधाविषयी नाराजी व्यक्त केली. अनेक सरकारी अधिकाऱ्यांनी मला कावड यात्रेदरम्यान माईक, डीजे आणि म्युझिक सिस्टीमला बंदी करण्यात आल्याचे सांगितले. परंतु, मी त्यांना एकच प्रतिप्रश्न केला की, ही कावड यात्रा आहे का शव यात्रा? कावड यात्रेत बाजा, डमरू, ढोल, चिमटे ही वाद्ये वाजली नाहीत, लोक नाचले-गायले नाहीत, तर यात्रेला अर्थच काय उरला?. आपल्या देशात प्रत्येकाला त्याचा सण साजरा करायचे स्वातंत्र्य आहे. आम्ही या प्रत्येकाच्या पाठिशी उभे राहू. तुम्ही नाताळ साजरा करा, तुम्हाला या देशात कधी त्यासाठी कुणी रोखलेय का?, तुम्ही कायद्याच्या कक्षेत राहून निश्चिंतपणे नमाजही पठण करु शकता. तुम्हाला कुणीही रोखणार नाही. मात्र, कायद्याचे उल्लंघन केले तर कुठे ना कुठे संघर्ष हा अटळ आहे, असा सूचक इशाराही योगी आदित्यनाथ यांनी दिला.

तसेच त्यांनी भाजप जातीयवादाचे राजकारण करत असल्याचा आरोपही फेटाळून लावला. आम्ही देशाची सांस्कृतिक एकता बळकट करण्यासाठी प्रयत्न करतोय तर आमच्यावर जातीयवादाचा शिक्का मारला जातो. आम्ही ‘गर्व से कहो हम हिंदू है’ असं म्हटलं तरी आम्हाला सांप्रदायिकतेच्या नावाने दूषणे दिली जातात, असेही योगी आदित्यनाथ यांनी सांगितले.