Rafale: भारत फ्रान्सकडून खरेदी करणार २६ राफेल लढाऊ विमाने, ६३ हजार कोटींच्या कराराला मोदी सरकारची मान्यता

खरेदी करण्यात येणाऱ्या २६ राफेल विमानांपैकी २२ सिंगल-सीटर विमाने असतील तर चार विमानांमध्ये दोन वैमानिक बसण्याची क्षमता असेल. सूत्रांनी दिलेल्या माहितीनुसार, ही विमाने प्रामुख्याने स्वदेशी बनावटीची विमानवाहू युद्धनौका आयएनएस विक्रांतवर तैनात केली जातील. यामुळे भारताला हिंद महासागर क्षेत्रातील चिनी हालचालींवर लक्ष ठेवणे सोपे होईल.

विमाने कधी मिळणार?

या करारावर स्वाक्षरी झाल्यानंतर ३७ ते ६५ महिन्यांत डसॉल्ट एव्हिएशनकडून बनवण्यात येणारी २६ राफेल-एम विमाने भारताला मिळण्याची अपेक्षा आहे, असे एएनआयने नमूद केले आहे.

प्रगत तंत्रज्ञानाचा वापर

या करारानुसार, नौदलाला २६ राफेल विमानांसह देशातील काही भागांत प्रशिक्षण, देखभाल, लॉजिस्टिक्स सपोर्ट आणि उत्पादनाचे मोठे पॅकेज देखील मिळणार आहे. याचा अर्थ केवळ विमानेच नाही तर त्यांना उडवण्याची आणि हाताळण्यासाठीही फ्रान्सकडून सहकार्य करण्यात येणार आहे. या करारात केवळ विमानांचाच समावेश नाही तर भारतीय हवाई दलासाठी ग्राउंड बेस्ड सॉफ्टवेअर आणि सिस्टम अपग्रेडचाही समावेश आहे. राफेल मरीन चालवण्यासाठी नौदलाला आयएनएस विक्रांतवर काही विशेष उपकरणे बसवावी लागतील जेणेकरून त्यांच्या कामगिरीत कोणतीही तडजोड होणार नाही.

उड्डाणादरम्यान इतर जेट्समध्ये इंधन भरण्याची क्षमता

नवीन राफेल सागरी लढाऊ विमान खरेदी करारामुळे भारतीय हवाई दलाची ताकद वाढेल कारण त्यामुळे त्यांची “बडी-बडी” हवेतील-हवेत इंधन भरण्याची प्रणाली सुधारेल. याचा अर्थ असा की, सुमारे १० आयएएफ राफेल जेट्स उड्डाणादरम्यान इतर जेट्समध्ये इंधन भरू शकतात, ज्यामुळे ते लँडिंगशिवाय लांब प्रवास करू शकतात.

एआयएनच्या मते, संरक्षण सूत्रांनी पूर्वी सांगितले होते की, नवीन करारात आयएएफच्या ताफ्यासाठी जमिनीवरील उपकरणे आणि सॉफ्टवेअर अपग्रेडचाही समावेश असू शकतो. याव्यतिरिक्त, ४.५ जनेरेशनच्या राफेल विमानांच्या ऑपरेशनला सहाय्य करण्यासाठी भारतीय नौदलाला त्यांच्या विमानवाहू जहाजांवर काही विशिष्ट उपकरणे बसवावी लागतील. याशिवाय, नौदल डीआरडीओ द्वारे तयार करण्यात येत असलेल्या स्वदेशी पाचव्या पिढीतील लढाऊ विमानांचा समावेश करण्याची योजना आखत आहे.