पीटीआय, कुवेत शहर
पंतप्रधान नरेंद्र मोदी शनिवारी दोन दिवसांच्या कुवेत दौऱ्यावर पोहोचले असून पहिल्या दिवशी त्यांनी विविध क्षेत्रांमध्ये काम करणाऱ्या भारतीयांची भेट घेतली. अनिवासी भारतीयांनी जगाच्या प्रगतीमध्ये दिलेल्या योगदानाची त्यांनी प्रशंसा केली. मोदी यांच्या सन्मानार्थ येथे शेख साद अल-अब्दुल्ला क्रीडा संकुलात आयोजित करण्यात आलेल्या ‘हाला मोदी’ या कार्यक्रमाला मोठ्या प्रमाणात अनिवासी भारतीयांनी गर्दी केली. यावेळी मोदी म्हणाले, कौशल्याच्या क्षेत्रामध्ये जगाची राजधानी होण्याची भारताची क्षमता आहे.
हेही वाचा >>>Robin Uthappa : भारताच्या माजी क्रिकेटपटू विरोधात अटक वॉरंट, जाणून घ्या नेमकं काय आहे प्रकरण
महाभारत आणि रामायणाचे अरबीमध्ये भाषांतर तसेच प्रकाशन करणाऱ्या कुवेतमधील दोन नागरिकांची पंतप्रधान नरेंद्र मोदी यांनी भेट घेतली. दोन्ही ग्रंथांच्या अरबी आवृत्त्यांच्या प्रतींवरही पंतप्रधानांनी स्वाक्षरी केली. कुवेतचे श्रीमंत शेख मेशाल अल-अहमद अल-जाबेर अल-सबाह यांच्या निमंत्रणावरून मोदी कुवेतला गेले. त्यांचा हा दौरा दोन दिवसांचा आहे. ४३ वर्षांत भारतीय पंतप्रधानांची कुवेतला ही पहिलीच भेट आहे. तत्कालीन पंतप्रधान इंदिरा गांधी १९८१मध्ये कुवेतला गेल्या होत्या.
दरवर्षी शेकडो भारतीय कुवेतला येतात. तुम्ही कुवेती समाजामध्ये भारताचा ठसा उमटवला आहे. कुवेतमध्ये तुम्ही भारतीय कौशल्याचे रंग मिसळले आहेत. तुम्ही कुवेतमध्ये भारताची प्रतिभा, तंत्रज्ञान आणि परंपरा घेऊन आला आहात. -नरेंद्र मोदी, पंतप्रधान
